Il-pjan li tħabbar nhar is-Sibt biex suppost tittaffa l-problema tat-traffiku, xejn ma niżel tajjeb. Aktar u aktar mad-dilettanti tal-vetturi meqjusin bħala klassiċi. Bid-dilettanti nfushom jinsistu li din hija vendikazzjoni fuqhom.
Waqt il-programm NETLIVE, Oliver Attard – li huwa passjonat ta’ dawn il-karozzi – spjega r-rabja kbira li hemm bħalissa fost id-dilettanti wara li l-Ministru Chris Bonett ħabbar li minn Ġunju jridu jkunu għaddew 35 sena biex vettura tibda tkun meqjusa bħala klassika. U b’hekk, se jkun żied il-parametri b’ħames snin.
Il-karozzi klassiċi huma dawk li jkollhom il-pjanċi suwed. U jistgħu jinstaqu biss fuq distanza ta’ 3,000 kilometru kull sena.
Sal-lum, dawn iħallsu €8 liċenzja – u f’ċertu każi jkunu qed jiffrankaw mal-elf ewro.
Intant, ħafna huma dawk li qed jirrimarkaw kif il-Gvern, effettivament, mhux jindirizza l-problema mill-għeruq tagħha – li hija kollha marbuta mal-isplużjoni fil-popolazzjoni, u l-importazzjoni ta’ ħaddiema barranin.
