Anke quddiem it-tariffi ġodda mħabbra mill-President Amerikan fl-aħħar sigħat li se jolqtu fil-laħam il-ħaj lill-konsumaturi u lin-negozji Ewropej – fosthom dawk Maltin – il-Gvern ta’ Robert Abela jibqa’ jagħżel l-interessi tiegħu u ta’ dawk ta’ madwaru minflok joħroġ bis-soluzzjonijiet għall-isfidi tal-pajjiż u jiddefendi lill-poplu Malti u Għawdxi.
Dan qalu l-Kap tal-Partit Nazzjonalista Bernard Grech f’kumment imxandar fuq il-midja soċjali l-għada li fil-Parlament il-Gvern tal-Labour ivvota favur it-tneħħija tad-dritt taċ-ċittadini li jiftħu Inkjesti Maġisterjali biex jiġu investigati politiċi korrotti u vvota waħdu biex jiċċensura lill-Oppożizzjoni. Dan hekk kif il-President Amerikan kien qed iħabbar tariffi ġodda li se jolqtu wkoll il-kummerċ bejn Malta u l-Istati Uniti.
Fil-fatt, qal Bernard Grech, fl-aħħar sigħat kellna prova oħra ċara li minflok imorru l-Parlament biex jiddefendu l-interessi tal-poplu Malti u jserrħulu rasu li se jagħmlu minn kollox biex l-effett tat-tariffi ma jkunx qed jgħolli l-prezzijiet f’pajjiżna, Abela u sħabu jmorru l-Parlament biex jagħlqu ħalq l-Oppożizzjoni u biex inaqqsu mid-drittijiet tiegħek.
Bħalma għamel fil-każ tal-Mozzjoni tal-Partit Nazzjonalista dwar l-Għoli tal-Ħajja, intiża li tipprovdi soluzzjonijiet għad-diffikultajiet li qed jiffaċċja l-poplu Malti, anke fil-każ tat-tariffi mħabbra minn Donald Trump li se jimpattaw l-ekonomija tal-Unjoni Ewropea, il-Gvern ta’ Abela jibqa’ jaħrab milli jindirizza dak li qed jolqot lill-Maltin.
Minflok, il-Gvern ta’ Robert Abela huwa medhi jattakka u jipprova jiċċensura lill-Partit Nazzjonalista, u jċaħħad liċ-ċittadini mid-drittijiet tagħhom kif għamel ilbieraħ bit-tibdil fil-liġi tal-Inkjesti Maġisterjali li issa kien approvat.
Għall-kuntrarju, qal Bernard Grech, il-Partit Nazzjonalista se jibqa’ jkun il-vuċi tiegħek fil-Parlament. Se jibqa’ jippreżenta s-soluzzjonijiet għall-isfidi li jolqtu lilek, bħalma għamel meta ressaq miżuri li jindirizzaw l-għoli tal-ħajja. Proposti li ladarba l-Gvern warrabhom fil-ġenb, irid ikun Gvern ġdid Nazzjonalista li bil-vot tal-poplu Malti, idaħħalhom fis-seħħ. Kif se jkun Gvern ġdid Nazzjonalista li jerġa’ jagħti lura d-dritt lill-vittmi li jitolbu investigazzjoni.
Dwar it-tħabbira tat-tariffi ġodda imposti fuq l-UE mill-President Amerikan, il-Kap tal-Partit Nazzjonalista appella lill-Gvern ta’ Robert Abela biex jieħu pożizzjoni b’saħħitha kontrihom biex jiddefendi lill-konsumaturi u lill-industrija. Hu temm jgħid li l-Partit Nazzjonalista jappoġġja l-pożizzjoni li qed jieħdu l-UE u l-Istati Membri l-oħra sieħba ta’ Malta biex ikun hemm rispons wieħed b’saħħtu u magħqud għal dak li ħabbar il-President Amerikan, fl-istess ħin li ma titwarrabx il-possibbiltà ta’ negozjati li jistgħu jwasslu għal soluzzjonijiet komuni.
