Is-Safeguarding Commission tal-Knisja f’Malta preżentat ir-rapport annwali ghas-sena 2024, fejn fost l-oħrajn semmiet ix-xogħol li qed isir rigward il-każijiet li jirċievu.
Mark Pellicano, il-Kap tas-Safeguarding, beda l-preżentazzjoni billi semma li matul is-sena li għaddiet huma għamlu laqgħat ma’ għadd ta’ entitajiet sabiex flimkien ikunu jistgħu ikomplu jipproteġu l-minorenni u l-adulti vulnerabbli.
Huma qed iwettqu wkoll għadd ta’ inizjattivi għat-taħriġ, kemm lokalment u anke barra minn Malta.
Matul is-sena 2024 huma organizzaw 48 sezzjoni, u matul is-sena li ġejja Pellicano sostna li huma se jkomplu jagħmlu dawn is-sezzjonijiet.
Bħala Safeguarding Commission, huma qed iwettqu xogħolhom permezz tas-Safeguarding Advisory Board, is-Safeguarding Review Board u s-Safeguarding Office.
Ma’ NET News, Pellicano spjega kif huma jagħżlu lil membri f’dawn il-boards, speċjalment minħabba li dan hu xogħol sensittiv.
Matul is-sena 2024, is-Safeguarding Commission ikkonkludew 41 każ, filwaqt li ssostanzjat 10 każijiet; b’wieħed mil-każijiet jinvolvi minorenni u l-bqija jinvolvu adulti vulnerabbli.
Fil-każ tal-minorenni, il-każ kien jinvolvi pesuna lajka u l-allegazzjoni kienet tinvolvi prattika professjonali ħażina.
Fil-każ tal-adulti vulnerabbli, kien hemm 3 każijiet li nvolvew sacerdoti djoċesani, 5 każijiet li nvolvew reliġjużi, u każ wieħed li nvolva lajka. 4 mill-każijiet li kienu jinvolvu reliġjużi kienu relatati ma’ abbuż sesswali u dawn ġew sospiżi minn xogħolhom. Wieħed mill-vittmi mar għand l-awtoritajiet ċivili iżda ma marx ‘il quddiem b’investigazzjoni.
Is-Safeguarding Commission hija mpenjata sabiex tkompli tibni kultura ta’ safeguarding fi ħdan il-knisja, kif ukoll tmexxi l-messaġġ li l-prattiċi ta’ safeguarding għadhom ikunu prijorita’ f’kull entita’ f’Malta.
