Li gvern jipprova jsolvi l-problemi li ħoloq hu stess hija l-inqas ħaġa li jista’ jagħmel. Imma gvern serju li verament irid isolvi l-problemi, imur quddiem il-poplu bi pjan ċar, b’miri konkreti, u b’soluzzjonijiet studjati, mhux b’ideat sparpaljati b’ħafna truf li hu stess qed jammetti li ma jafx humiex se jaħdmu.
Il-Ministru Chris Bonett kompla jikkonferma kemm dak li ħabbar nhar is-Sibt kien bla pjan u mingħajr ma saret konsultazzjoni meta siegħa wara konferenza tal-aħbarijiet tal-Partit Nazzjonalista li saret illum waranofsinhar kellu jammetti li l-idea li jbiddel l-iskema tal-karozzi vintage kienet waħda li ma tagħmel l-ebda sens u kellu jmur lura fuq dak li qal ħamest ijiem ilu. Bonett reġġa’ lura din il-miżura wara pressjoni qawwija li saret mill-Oppożizzjoni fl-aħħar jiem kemm fil-Parlament kif ukoll barra.
Waqt il-konferenza tal-aħbarijiet indirizzata mix-Shadow Minister għat-Trasport u l-Mobbiltà Mark Anthony Sammut u x-Shadow Minister għall-Fondi Ewropej u Sport David Agius, il-Partit Nazzjonalista qal li l-problema tat-traffiku li eskalat fl-aħħar snin bil-politika tal-Gvern li sploda l-popolazzjoni teħtieġ soluzzjoni li tibda tinħass fl-immedjat imma li tħares fit-tul.
Il-Partit Nazzjonalista qed jisma’ u jiddiskuti dak li għandu bżonn pajjiżna f’dan il-qasam biex ikompli jfassal il-pjan tiegħu għat-traffiku u t-trasport u nhar il-Ħadd filgħodu se jkun qed ikompli din d-diskussjoni b’laqgħa ma’ dawk involuti li se ssir fi Ġnien l-Istazzjon f’Birkirkara.
Il-Gvern Laburista tliet snin ilu, lejliet elezzjoni, ġie quddiem il-poplu b’dik li kellha tkun is-soluzzjoni – il-metrò. U għal dan, il-poplu ħallas €2,000,000 minn butu. Illum il-Ministru qal li din ma tistax issir għax m’hemmx flus għaliha.
Issa ġie quddiem il-poplu b’dawk li hu qed isejjaħ “soluzzjonijiet”, imma li lanqas hu stess ma jaf kemm se jkunu effettivi.
Il-Ministru Chris Bonett mistoqsi kemm-il darba dwar x’miri għandu f’termini ta’ numru ta’ karozzi li se jonqsu mit-toroq bil-miżuri li ħabbar, qal li ma hemmx miri u li anke jekk tonqos karozza waħda jkun tajjeb.
Ix-Shadow Ministers qalu li r-retorika mhux se ssolvi l-problemi li qed iħabbtu wiċċhom magħhom in-nies ta’ kuljum. Il-Gvern ta’ Robert Abela tilef kull kredibbiltà dwar il-problema tat-traffiku u mhux se jġibha lura jekk lanqas biss kapaċi jipprovid miri ċari ta’ fejn irid imur.
Mhux se jġibha lura jekk qed jippretendi li n-nies iċedu l-liċenzja mingħajr ma joffri alternattivi prattiċi bħal sevizz tat-trasport tal-massa li hu komdu u effiċjenti, u li l-Maltin lesti li jużaw.
Is-Sibt li għadda Chris Bonett qal ukoll kemm-il darba li jekk xi miżuri ma jaħdmux, imbagħad ibiddilhom. Jekk il-Ministru għamel il-homework tiegħu sew, suppost għandu studji li juru kif għandhom jaħdmu l-miżuri li ħabbar. Jekk lanqas il-Ministru ma jaf hux se jaħdmu dawn il-miżuri, min suppost jaf?
Għal darba oħra l-Gvern qabad il-problema minn sieqha. L-ewwel kellu jipprovdi l-alternattivi, imbagħad jipprova jinċentiva lin-nies iċedu l-liċenzja.
Il-kelliema tal-PN qalu li fost dak li ħabbar il-Ministru tat-Trasport hemm miżuri li jekk jitqiegħdu f’qafas sħiħ u mhux sparpaljati, jistgħu jkunu parti mis-soluzzjoni, fosthom dik għal vapur iddedikat għall-merkanzija għal Għawdex. Dan il-vapur kien jeżisti fi żmien Gvern Nazzjonalista u kien l-istess Gvern Laburista li waqqaf is-servizz.
Il-Partit Nazzjonalista jaqbel mal-Istrateġija Nazzjonali dwar il-mixi, u mal-ġbir tal-iskart barra mill-ħinijiet tat-traffiku. It-tibdil fir-rotot biex iservu aħjar iċ-ċentri fejn jaħdmu n-nies huwa xi ħaġa tajba, imma ma tistax tkun miżura iżolata. It-trasport pubbliku għadu mhux iħajjar biżżejjed nies biex iħallu l-karozza d-dar.
Hu ta’ sodisfazzjon għall-Partit Nazzjonalista li l-Gvern qed jaddotta miżura oħra tiegħu – il-Walking School Bus – li kien beda l-Kunsill Malti għall-Isport 20 sena ilu. Il-PN iħeġġeġ ukoll biex in-National Cycling Strategy, li ilha li ħarġet għal konsultazzjoni sentejn, issa tiġi konkluża u tibda tiġi implimentata b’infrastruttura li tħares is-sigurtà taċ-ċiklisti.
Fl-aħħar, il-kelliema tal-Partit Nazzjonalista qalu li l-Ministru tat-Trasport mhux se jsolvi l-problema tat-traffiku billi jisraq lid-dilettanti tal-karozzi klassiċi mid-delizzju tagħhom. Dawn il-karozzi ma jistgħux jaqbżu t-3,000km fis-sena u żgur li mhumiex huma li qed joħolqu l-problema u l-Gvern m’għandux jiskarta karozzi klassiċi billi jbiddel l-iskema. Jekk hemm abbużi l-Gvern għandu jara li jwaqqaf lil min qed jabbuża flok jitfa’ lil kulħadd f’keffa waħda.
Wara li l-Gvern ġabna ngħixu f’pajjiż fejn kulħadd fuq xulxin, traffiku kullimkien, għoli tal-ħajja, stress u ansjetà, irid isolvi l-problemi li ħoloq billi joqtol delizzju.
Robert Abela u l-Gvern tiegħu għandhom jaraw li ma jkomplux joħolqu aktar problemi bħalma għamlu meta ġabu lil Transport Malta għarkopptejha billi għabbewha b’ħafna nies.
Il-problemi li joħloq il-Gvern m’għandhomx iħallsu għalihom la d-dilettanti u lanqas il-poplu inġenerali.
