Awtur u politiku Libjan li ppubblika dokumenti li qed jorbtu s-servizzi sigrieti Libjani mal-isplużjoni ta’ Lockerbie, spiċċa arrestat fil-Libja fuq akkużi li qed ‘jipperikola s-sigurtà nazzjonali’.
Samir Shegwara nżamm taħt arrest, jumejn biss wara li l-BBC irrapporta li d-dokumenti, jew files, kapaċi jipproduċu l-provi kontra Libjan partikulari akkużat bħala l-manifattur tal-bomba li, f’Diċembru tal-1988, qered ajruplan tal-linja Pan Am li kien għaddej fuq il-belt Skoċċiża ta’ Lockerbie u bir-riżultat li mietu 270 persuna.
Is-suspettat, Abu Agila Masud Kheir Al-Marimi, qed jiffaċċja proċess tal-qorti f’Washington u qed jiċħad kull involviment fil-każ terroristiku li xokkja lid-dinja.
Id-dokumenti, fl-istess ħin, anki jimplikaw lill-aġenti Libjani fil-qerda ta’ ajruplan tal-passiġġieri li, fl-1989, kien iġġarraf fid-deżert tas-Sahara – u fejn spiċċaw mietu 170 oħra.
Samir Shegwara sostna li d-dokumenti kienu elevati mill-arkivji ta’ Abdullah Senussi li kien imexxi lis-servizzi sigrieti Libjani u liema files setgħu jkunu analizzati wara l-kroll tar-reġim tal-Kurunell Muammar Gaddafi, fl-2011.
Il-kontenut tal-files kienu ppubblikati fi Franza f’Jannar ta’ din is-sena u permezz tal-ktieb The Murderer Who Must Be Saved… Ktieb li l-koawturi tiegħu huma l-istess Samir Shegwara u l-ġurnalisti investigattivi Franċiżi, Karl Laske u Vincent Nouzille.
L-istampaturi tal-ktieb, min-naħa tagħhom, sostnew li Shegwara qed jiffaċċja l-proċeduri legali dwar ‘l-allegat pussess ta’ dokumenti tas-sigurtà klassifikati’ mingħajr l-ebda ġustifikazzjoni legali.
Il-BBC kien irrapporta li d-detektivs Skoċċiżi kienu qed jeżaminaw il-kopji tal-files li kapaċi jirrappreżentaw l-ewwel provi konkreti li s-servizzi sigrieti Libjani kienu tassew responsabbli għall-isplużjoni ta’ Lockerbie.
Intant, Shegwara, li hu wkoll is-Sindku ta’ Hay al Andalous – muniċipalità fi Tripli – kien arrestat mill-pulizija ftit tal-jiem ilu u meta hu ma għamel l-ebda sigriet mill-fatt li kien fil-pussess tad-dokumenti inkwistjoni.
