Mara li għamlet rapport mal-Pulizija fejn qalet li kienet stuprata minn żewġha li miegħu kienet għaddejja minn diffikultajiet kbar qalet li hija għaddiet minn martirju dak inhar tal-istupru għaliex ukoll dak il-ħin – iż-żewġ uliedhom kienu fid-dar matrimonali reqdin. Ir-raġel qed iwieġeb mhux ħati tal-akkużi miġjubin kontrih, inkluż li kien f’pussess ta’ droga kokaina.
L-allegata vittma li isimha ma jistax jixxandar għall-protezzjoni tagħha u ta’ uliedha xehdet il-Ħamis filgħodu dwar il-każ. Isem żewġha ta’ 38 sena minn Ħal Tarxien akkużat li bl-istupru ta’ martu fost akkużi oħra, wkoll ma jistax jissemma, għaliex inkella tinkixef l-identità tat-tfal u ta’ martu.
Fit-tieni jum tal-ġuri l-vittma, mal-ewwel daqqa t’għajn għarfet lill-eks raġel tagħha fl-iżbarra, l-bank tal-akkużati. Il-ġuri ta’ raġel ta’ 38 sena minn Ħal Tarxien akkużat li bl-istupru ta’ martu fost akkużi oħra issokta hekk kif qed jiġi mixli li l-allegat reat ta’ stupru seħħ fit-31 ta’ Mejju 2019 wara li l-akkużat wasal lura minn każin u talabha tagħmel is-sess miegħu.
Madankollu l-mara qalet li żewġha kien ukoll sturpraja f’Jannar tal-istess sena. Hija qalet fil-Qorti li meta ġiet stuprata f’Mejju ta’ sitt snin ilu marret mill-ewwel iċ-Ċentru tas-Saħħa minħabba l-uġigħ li bdiet issofri u t-tobba qalulha biex tmur tagħmel rapport l-għassa għax ma kinitx ta’ idejhom.
Bid-dmugħ f’għajnejha u viżibilment emozzjonata,, il-mara qalet li ż-żewġt uliedhom kien rieqdin fl-istess dar waqt li żewġha beda jistupraha. Qalet li ddeċidiet togħqod kwieta u ma tgħajjatx waqt l-istupru biex ma tqajjimx lit-tfal. Hija qalet lill-ġurati li dawn kienu raw biżżejjed minn missierhom.
Il-mara qalet li żewġha beda jgħidilha “tibkix għax tirvillani”. Saħqet li l-imħabba tagħha għal żewġha kienet sfaxxat fix-xejn għaliex l-akkużat kien spiss jgħajjarha, b’xi drabi kien ikun anke aggressiv magħha. Qalet li uliedha kienu jarawh jgħajjat magħha u mhux l-ewwel darba li kien ikisser diversi għamara fid-dar.
Dwar il-karattru ta’ żewġha qalet li kien possessiv u waqt li bdew jisseparaw kellha tibqa torqod fis-sodda miegħu għax meta kien jaraha sejra torqod fis-sodda mat-tfal, kien jaqbad jgħajjat, jsabbat u saħansitra jqajjimha mis-sodda tat-tfal u joħodha fis-sodda matrimonjali miegħu.
L-Imħallef Consuelo Scerri Herrera staqsiet lill-mara, x’ġara wara l-istupru. Hi wieġbet li l-akkużat kien f’sakra kbira u raqad, filwaqt li hi libset u raqdet fl-istess sodda. Mill-ġdid l-Imħallef staqsitha għalfejn raqdet fl-istess sodda mal-akkużat wara li stupraha.
“Inutli nitlaq mis-sodda” qalet il-vittma. “Mentalment kont imkissra u ta’ spiss kien jgħidli li jien martu u jista’ jagħmel bija li jrid” kompliet tgħid l-allegata vittma. Dwar l-inċident ta’ Jannar, il-mara rrrakuntat li ġiet stuprata wkoll wara li r-raġel ircieva l-karti tas-separazzjoni għand ommu.
Qalet li dakinhar, l-eks raġel tagħha kien irrabjat ħafna għax ommu kienet inkwetata ħafna fuq is-separazzjoni. Qalet li kien aggressiv magħha, ċartilha l-flokk minn fuqha u stupraha. Qalet li b’dan il-mod kien jaġixxi.
Qalet ukoll li l-akkużat kellu l-vizzju tax-xorb u meta kien ikollu “drink f’rasu ma kienx jirraġuna. Qalet li kien hemm episodji li dam barra sa filgħodu, u anke ammetta magħha li kien jieħu l-kokaina. Il-vittma żiedet li anke mat-tfal kien ikun aggressiv fi kliemu, b’xi drabi kienu jibżgħu minnu meta jindunaw li wasal lura d-dar fit-tard mill-każin.
Hekk kif kompliet tixhed b’emozzjoni kbira, qalet li uliedha kellhom saħansitra jmorru għat-terapija wara li s-separazzjoni. Irrakuntat ukoll episodju ta’ vjolenza domestika mill-eks raġel tagħha. “Kien indannat u kellu l-ġuħ” qalet il-vittma.
Sostniet li meta qaltlu li ma tistax isajjar dak il-ħin għax kellha bżonn tagħmel xi qadi, wadbilha platt tal-ħġieġ, u sabtilha wiċċha mat-taraġ tal-ħadid. Hija soffriet minn black eye u marret tagħmel rapport l-għassa mat-tfal li marru magħha.
Il-prosekuzzjoni talbet lill-vittma tispjega ittra legali li bagħtet l-avukat tagħha lill-akkużat. Il-mara spjegat li hija tkellmet dwar l-istupru ta’ Jannar mal-avukat tagħha, u tagħta l-parir biex tqum fuq tagħha u tressaq rapport.
“Kont nibża ħafna minnu, kont nibża li joqtolni għax kien jheddidni li jekk nirrapurtah jagħmilli agħar” xehedet il-mara. Tenniet ukoll li l-avukat kitbet ittra legali lill-akkużat u nfurmatu li jekk jagħmel xi tip ta’ kuntatt fiżiku drabi oħra, kienu ser jittieħdu passi legali kontrih.
Il-mara hawn għaddiet biex titkellem dwar il-ħajja fiż-żwieġ fejn jidħlu finanzi. Qalet li kienet taħdem ħafna, minn kmieni filgħodu sa tard filgħaxija għax l-koppja kellhom diversi problemi finanzjari, minħabba l-vizzju tax-xorb tal-akkużat.
Sostniet li xi drabi kienu jispiċċaw l-flus fil-kont tal-bank tagħhom, bl-akkużat imur il-ħanut tagħha u joħdilha l-flus mill-cash sabiex imur jixrob. Il-prosekuzzjoni qed titmexxa mill-Avukati Darlene Grima u Jennifer Polidano mill-Uffiċċju tal-Avukat Ġenerali. Għall-akkużat qed jidhru l-Avukati Simon Micallef Stafrace u Julia Micallef Stafrace.
