L-internazzjonali Malti, Ilyas Chouaref il-bieraħ filgħaxija, f’match day 30 tas-Super League Żvizzeru skorja s-sitt gowl tal-Kampjonat. Hu fetaħ l-iskor għal FC Sion, iżda f’dahrom, it-tim ta’ Chouaref spiċċa biex tilef il-partita kontra Winterthur, bl-iskor ta’ 2-1, b’gowls fit-80 u fid-94 minuta.
Il-bieraħ filgħaxija, apparti l-internazzjonali Malti Teddy Teuma, lilhinn minn pajjiżna kien hemm Malti ieħor li skorja mat-tim li jilgħab miegħu. Ilyas Chouaref, il-winger offensiv li kiseb il-passaport Malti fi Frar u ħalla impressjoni mill-aqwa fl-ewwel żewġ partiti tiegħu ma’ Malta, skorja s-sitt gowl tiegħu fis-Super League tal-Iżvizzera ma’ FC Sion.
Chouaref tefa’ lil FC Sion fil-vantaġġ ftit qabel il-mistrieħ b’konkluzzjoni fil-baxx, li l-plejer ta’ 24 sena kien kapaċi jikkordina tajjeb qabel ma xeħet fix-xibka avversarja.
FC Sion kienu qed jilgħabu kontra Winterthur, it-tim ankrat fl-aħħar post tal-klassifika. Winterthur irnexxilhom idawru telfa f’rebħa fl-aħħar ħinijiet tal-partita, meta fit-80 minuta skorjaw il-gowl tad-draw u erba’ minuti fuq id-90 minuta, Winterthur reġgħu skorjaw biex rebħu 2-1 barra minn dahrom.
B’dan ir-riżultat, FC Sion qed ikomplu jirriskjaw ir-relegazzjoni fl-aħħar tal-istaġun.
