Kollox għadu inċert minn dak li possibilment jista’ jiġri nhar il-Ħadd li ġej, meta fit-3pm se jkunu qed jintlagħbu fl-istess ħin tliet partiti mill-aħħar match day tal-IZIBET National Amateur League 1, fejn s’issa ebda tim għadu ma kien promoss u kollox se jkun determinat fl-aħħar ġurnata ta’ dan il-Kampjonat.
It-timijiet li għadhom biċ-ċans li jiksbu promozzjoni għaċ-Challenge League tal-istaġun li ġej huma tlieta; Birżebbuġa St Peter’s, Vittoriosa Stars u San Ġwann. Tnejn minn dawn it-tlieta nhar il-Ħadd se jkunu qed jiċċelebraw il-promozzjoni, u wieħed minnhom se jkun qed jirbaħ l-IZIBET National Amateur League 1.
Ta bilħaqq li se jkolna tmiem drammatiku għal min se jkun qed jilħaq it-tragward mixtieq, iżda ebda minn dawn it-tliet timijiet m’huma se jigħabu kontra xulxin.
Bireżebbuġa St Peters se jkunu qed jilgħabu dik li possibilment hija l-itqal logħba mit-tlieta skedati mit-Top 6 ta’ dan il-Kampjonat, meta se jkunu qed jaffrontaw lil Xgħajra Tornados fil-Victor Tedesco Stadium.
Fl-istess ħin tat-3pm, fl-iStadium tas-Sirens, Vittoriosa Stars jilgħabu kontra Attard, filwaqt li fl-iStadium taċ-Ċentinarju, San Ġwann se jkunu qed jilgħabu l-aħħar logħba tagħhom f’dan il-Kampjonat kontra Luqa St Andrews.
Fil-klassifika attwali, Birżebbuġa St Peter’s u Vittoriosa Stars jinsabu t-tnejn fl-ewwel post tal-klassifika, b’43 punt kull wieħed. San Ġwann isegwu, b’42 punt.
Dwar din it-tmiem drammatiku, u l-premutazzjonijiet li jista’ jkolna, skont ir-riżultati li jista’ jkolna f’dawn il-partiti, illejla, il-Ħamis, Replay Preview se jkun qed jitkellem fid-dettall bis-sehem dirett tat-tliet kowċis ta’ dawn it-tliet timijiet rispettivi.
Bħal kull nhar ta’ Ħamis filgħaxija, Christian Micallef, illejla fid-9:35pm se jkun qed iwasslilna programm ieħor interessanti, mimli kontenut u informazzjoni qabel jintlagħbu l-konfronti ta’ tmiem il-ġimgħa.
Għaldaqstant, f’Replay Preview tal-lejla, se jkun hemm diskussjoni dwar l-aħħar ġurnata tal-IZIBET National Amateur League 1, b’kollegamenti awjdo-viżivi fl-istess ħin mal-kowċis Edgar Degabriele (Birżebbuġa St Peter’s), Jason Camenzuli (Vittoriosa Stars) u Xavier Saliba (San Ġwann).
Dawn it-tlieta se jkollhom l-opportunitá jgħidu tagħhom qabel l-aħħar logħba tal-Kampjonat, filwaqt li jagħtu ħarsa lejn il-mixja tat-tim tagħhom tul dan l-istaġun kollu.
F’Replay Preview tal-lejla, li hu mwassal bl-appoġġ ta’ IZIBET, se jkun hemm diskussjoni dwar il-match day li tibda minn għada l-Ġimgħa tal-Malta Premier, kif ukoll dak li qed jiġri fiċ-Challenge League, fejn s’issa għadna konferma ta’ tim wieħed promoss, Valletta u għad fadal post għal promozzjoni ta’ tim ieħor, bil-battalja finali mistnnija tkun bejn Swieqi United u Tarxien Rainbows, li preżentament għandom l-istess ammont ta’ punti fit-tieni post tal-klassifika.
Replay Preview tal-lejla jibda fid-9:35pm fuq Net Television.
