Rapporti qed jindikaw li l-AFM keċċiet wieħed mis-sitt uffiċjali implikati fil-każ tas-serqa tad-droga li kienet miżmuma fil-barracks ta’ Ħal Safi. Dan filwaqt li suldat ieħor naqsulu l-grad.
Jirriżulta li b’kollox, is-sitt membri tal-AFM għandhom 134 jum li mhux se jitħallsu tagħhom. Minbarra dan, huma ġew imwissija b’mod formali u nħarġulhom twissijiet uffiċjali.
Skont l-istess rapporti, ġew revokati numru ta’ ħatriet uffiċjali li wasslu għal telf ta’ allowances – bil-possibbiltà wkoll li jitilfu opportunità li jiġu promossi fil-futur.
B’kollox, jirriżulta li l-armata ħarġet 55 akkuża dixxiplinarja fil-kofront ta’ dawn is-sitt uffiċjali.
L-AFM ma ħarġet ebda stqarrija uffiċjali dwar dawn l-iżviluppi.
Intant, fil-Qorti għadhom għaddejin il-proċeduri fil-konfront taż-żgħażagħ li jinsabu akkużati b’din is-serqa.
Il-każ seħħ fit-23 ta’ Frar li għadda, meta l-ħallelin daħlu fil-barracks b’numru ta’ basktijiet tax-shopping u kaxkru ‘l fuq minn 130 kilogramma kannabis. Huma qattgħu sagħtejn sħaħ deħlin u ħerġin għad-droga; bis-suldat li kien għassa baqa’ jara film, filwaqt li sieħbu kien qed jistriħ.
