Rio Micallef u David Tabone instabu ħatja li kkonfoffaw għat-traffikar tad-droga filwaqt li Darren James Vella ġie lliberat mill-ġurija tard il-Ħamis filgħaxija. Kien għall-ħabta tas-7pm. li l-ġurati ddeċidew li Micallef huwa ħati li kkonfoffa għat-traffikar fi kważi 2,000 pillola ecstacy b’sitt voti kontra tlieta. Is-sentenza mistennija tingħata nhar il-Ġimgħa, 11 ta’ April f’nofs inhar.
Il-ġurati sabuh ħati wkoll li biegħ l-ecstasy u li kien fil-pussess tagħha f’ċirkostanzi li kienu jindikaw li ma kienitx għal użu personali, b’7 voti favur u tnejn kontra fiż-żewġ każijiet. David Tabone instab ħati li kkonfoffa għat-traffikar tad-droga b’sitt voti kontra tlieta, filwaqt li kien illiberatu mir-raba’ u l-ħames akkuża. Minn naħa l-oħra Darren James Vella instab mhux ħati bi tmien voti kontra wieħed.
Numru konsiderevili ta’ qraba u ħbieb tal-akkużati, daħlu fl-awla tal-Qorti fit-tielet sular tal-binja biex jisimgħu l-verdett. Hekk kif il-verdett kien qed jinqara, omm Rio Micallef infaqgħet tibki u tgħajjat u tinstema; tgħid: “Wara 17-il sena!”
L-Imħallef Edwina Grima ordnat lill-marixxalli biex jeskortaw lill-ġenituri ta’ Micallef barra mill-awla.
Il-ġurati fil-ġuri ta’ tliet irġiel akkużatif’konfoffa ta’ traffikar ta’ droga 16-il sena kienu ilhom jiddeliberaw dwar il-każ il-Ħamis ftit wara nofsinhar.
Rio Micallef mill-Marsa, David Tabone residenti n-Naxxar u Darren James Vella minn Birkirkara kienu qed jaffaċċjaw akkużi li kkonfoffaw biex jittraffikaw 1,940 pillola ecstasy fl-2008. Huma kienu qed iwieġbu mhux ħatja.
Il-ġurati rtiraw aktar kmieni l-Ħamis wara nofsinhar biex jiddeċiedu jekk it-tlieta humiex ħatja jew le tal-akkużi miġjuba kontrihom wara li kien ilhom jisimgħu l-evidenza mressqa mill-prosekuzzjoni sa mit-Tnejn, 24 ta’ Marzu.
Huma semgħu lill-prosekuzzjoni u lid-difiża jagħmlu l-każ tagħhom quddiem l-imħallef Edwina li jippresiedit il-ġuri. il-Ħamis filgħodu l- Imħallef ġabret fil-qosor il-fatti u l-argumenti tal-ġuri fis-sessjoni ta’ filgħodu, wara li kienet bdiet sa mill-Erbgħa filgħaxija tindirizza lill-ġurati.
Matul il-jiem li għaddew, il-ġurati semgħu kif it-tliet irġiel ġew arrestati meta l-pulizija rċeviet xi ‘tip-off’ fuq Tabone, li allegatament kien qed jitraffika d-droga. Ir-raġel kien tpoġġa taħt sorveljanza. Fil-15 ta’ Settembru, 2008, Tabone kien osservat ħiereġ minn daru, isuq lejn il-McDonald’s f’Birkirkara, fejn ingħaqad miegħu Vella.
It-tnejn imbagħad iltaqgħu ma’ Micallef, li kien fil-karozza tiegħu, u saqu lejn Triq il-Knisja l-Qadima fl-istess lokalità. Huma pparkjaw il-karozzi tagħhom ‘il bogħod minn xulxin, u tnejn mis-suspettati marru lejn garaxx, b’Tabone allegatament iġorr borża sewda.
Meta Micallef induna il-preżenza tal-pulizija, ipprova jaħrab u tefa’ borża bajda taħt vann ipparkjat qabel ħarab. Huwa ġie arrestat flimkien ma’ Vella u Tabone. Ġewwa l-borża, il-pulizija sabet 1,940 pillola ecstasy b’valur tat-triq stmat ta’ €18,624.
Il-pulizija qabdet ukoll €9,330 fi flus kontanti u sett ta’ mwieżen elettroniċi li kien fihom traċċi tad-droga, li kienu ġewwa borża sewda li Tabone allegatament kien qed iġorr. L-Imħallef Edwina Grima semgħet il-guri hekk kif kienet qed tippresiedi l-Qorti Kriminali.
L-avukati Kevin Valletta, Godwin Cini u Danica Vella mexxew il-prosekuzzjoni f’isem l-Uffiċċju tal-Avukat Ġenerali. L-avukati Arthur Azzopardi u Jacob Magri dehru f’isem David Tabone. L-avukati José Herrera u Alex Scerri Herrera qed jassistu lil Rio Micallef. L-avukati Michael Sciriha u Matthew Xuereb assistew lil Darren James Vella.