L-Ungerija qed toħroġ mill-Qorti Kriminali Internazzjonali (ICC) – pass kontroversjali li kien ikkonfermat minn Budapest sigħat wara li l-Prim Ministru Iżraeljan, Benjamin Netanyahu, wasal fil-pajjiż għal żjara statali. Din iiż-żjara saret fi żmien meta l-Qorti għandha mandat għall-arrest pendenti għal Netanyahu b’konnessjoni ma’ reati tal-gwerra.
Il-Prim Ministru Ungeriż, Viktor Orban, f’Novembru kien stieden lil Netanyahu biex iżur pajjiżu – bl-invit joħroġ fl-istess żmien tal-mandat mill-ICC. Orban mal-ewwel għamilha ċara li d-direttiva ta’ din il-Qorti ma kien se jkollha l-ebda effett f’pajjiżu.
F’Novembru, l-Imħallfin f’The Hague qalu li kellhom ir-‘raġunijiet sodi’ biex jimplikaw lil Netanyahu fl-allegati reati tal-gwerra u reati kontra l-umanità waqt il-gwerra bejn Iżrael u l-Ħamas. L-Imħallfin qalu li Netanyahu għandu jġorr ir-responsabbiltà kriminali għal dan, bil-mexxej Iżraeljan jikkundanna d-deċiżjoni tal-ICC bħala wieħed ‘antisemitiku’.
L-ICC hi Qorti globali bl-awtorità biex tipproċessa lill-individwi akkużati dwar ġenoċidju, reati kontra l-umanità u reati tal-gwerra. Intant, l-Ungerija, waħda mill-Istati fundaturi tal-Qorti (li għandha 125 Stati membri), saret l-ewwel pajjiż-membru tal-Unjoni Ewropea li għażlet biex ixxolji din is-sħubija. Madankollu il-ħruġ tal-Ungerija mill-ICC mhux se jkollu impatt għall-proċeduri attwali ta’ din il-Qorti.
Sadanittant, Viktor Orban qed jixli lill-ICC bħala ‘Qorti li taġixxi skont il-politika li jixirqilha’, fost il-kundanna għall-mandat għall-arrest ta’ Netanyahu. Min-naħa tiegħu, il-Prim Ministru Iżraeljan faħħar id-deċiżjoni ‘kuraġġuża’ tal-Gvern Ungeriż biex pajjiżu ma jiffurmax aktar parti mill-ICC – bil-Ministru Iżraeljan għall-Affarijiet Barrann, Gideon Sa’ar, jirringrazzja lil Orban ‘għall-appoġġ morali tiegħu’.
Id-deċiżjoni tal-Ungerija tinkwadra fil-politika barranija ġenerali tal-Ungerija taħt Viktor Orban – u meta l-mexxej Ungeriż ilu jiżviluppa r-rabtiet mill-qrib u kordjali ma’ Iżrael.
Fl-istess ħin, il-Gvern f’Budapest jikkritika s-sitwazzjonijiet fejn l-istituzzjonijiet internazzjonali jkunu jidhru li qed jaffettwaw is-sovranità ta’ pajjiż partikulari. Madankollu, il-ħruġ tal-Ungerija mill-ICC, minkejja l-aspett simboliku u l-implikazzjonijiet politiċi, ma jibdlux sinifikattivament il-kapaċitajiet u l-qafas legali tal-Qorti f’The Hague.
