Raġel ta’ 30 sena, il-Ħamis wieġeb mhux ħati li sawwat lil martu li hija tqila, b’mod ripetut matul il-jiem li għaddew. Iċ-ċittadin minn Nepal li jgħix il-Gżira ġie akkużat li kkaġuna lil martu biża’ li se tintuża vjolenza kontriha, ikkaġunalha ġrieħi ħfief, aggrediha, heddidha u insulenta, fost akkużi oħra.
Huwa wieġeb mhux ħati. L-ispettur Omar Zammit qal lill-Qorti li l-allegata vittma ressqet rapport fl-1 ta’ April fejn qalet lill-Pulizija li minn meta marru fl-appartament tagħhom fil-Gżira 12-il jum ilu, ir-raġel beda jsawwatha kull darba li jargumentaw.
Fl-aħħar inċident li seħħ bejn il-31 ta’ Marzu u l-1 ta’ April, ir-raġel allegatament weġġagħha ħafif. Il-mara għandha madwar 12-il ġimgħa tqala. Huwa mifhum li l-allegata l-vittma qed issostni li l-akkużat qarraq biha, filwaqt li r-raġel ċaħad l-allegazzjonijiet u qal li kienet hi li tinsab f’relazzjoni ma’ xi ħadd.
F’dan l-istadju ma ntalbitx il-libertà proviżorja peress li l-koppja jgħixu flimkien.
Il-Qorti kienet preseduta mill-Maġistrat Monica Vella.
