minn Angelo Micallef
Din il-ġimgħa l-Gvern ta’ Robert Abela ħareġ idoqq it-trombi bħallikieku qed jistenna xi grazzi u prosit li fil-Parlament ġiet approvata fi stadju ta’ kumitat ir-riforma fil-liġi tal-inkjesti maġisterjali. Riforma li mhi riforma xejn għajr rigress għax se tara dritt li kien igawdi kull ċittadin jiġi mnaqqar biex b’hekk jiggwadanja aktar saħħa u poter min ipoġġi fuq is-siġġu tal-poter.
Kemm kien kiteb sew l-Eks Dekan tal-Fakultà tal-Liġi l-Prof. Kevin Aquilina meta fid-9 ta’ Frar f’The Malta Independent on Sunday kien stqarr li; “Who are the end losers of this Bill? Surely not corrupt officers of the public administration who gain impunity for their crimes-to-be, who will never be investigated for fraud, misappropriation, bribery, and not carrying out their lawful duties.
It is the proper administration of justice, the independence of the judiciary from government interference in their judicial business, rectitude, integrity, honesty, good governance, good administration, openness, transparency, accountability, and Malta’s international reputation for fighting crime that will soon be the end losers. It is now more than ever before appropriate to label Malta as a state hijacked by the mafia.
The once upon a time right – albeit its deficiencies – that a public-spirited citizen enjoyed to hold state officials accountable for criminal activity will soon be relegated to the annals of history, torn asunder institutionalising – instead of fighting – the culture of impunity in the Criminal Code of Malta. Bill No 125 is the icing on the cake of the rule of law coffin.”
Kliem li lissen ukoll il-Prim Imħallef Emeritu Silvio Camilleri meta f’kumment fuq it-Times of Malta stqarr li; “But let’s not beat around the bush: this “reform” will only serve to shield politicians and their persons of trust from investigation.”
Huwa ta’ għajb u tal-mistħija li wasalna sal-punt li pajjiżna qed idgħajjef id-dritt taċ-ċittadin biex nagħtu palata lil min żgur ma’ ħaqqu l-ebda palata. Huwa ta’ għajb li għal darb’oħra fl-istorja tiegħu l-Partit Laburista qiegħed jaħdem kontra d-demokrazija u l-libertà.
Madankollu għaliex qed niskantaw? Hekk għamlu fis-sebgħinijiet u t-tmeninijiet u hekk qed jerġgħu jagħmlu! Is-sorpriża tkun mhux meta l-Partit Laburista jaħdem kontra d-demokrazija u l-libertà imma jekk qatt xi darba jaħdem favur id-demokrazija u l-libertà! Huwa għalhekk importanti aktar min qatt qabel li nkunu sodi u naħdmu għall-ġid ta’ pajjiżna għaliex tassew għandna bżonn paġna ġdida llum qabel għada.
Argument perikoluż
Il-kollega opinjonist Joe Calleja, il-ġimgħa li għaddiet, wieġeb artiklu li jien ktibt u ta tweġiba li fl-opinjoni tiegħi tkompli turi kemm Trump qiegħed tassew jimbotta messaġġ perikoluż.
Calleja kitibli li, “Trump hu l-President tal-Amerikani, ivvutat mill-Amerikani, biex iservi l-interessi Amerikani,” messaġġ li smajtu diġà diversi drabi minn opinjonisti Amerikani magħrufa għall-appoġġ qawwi lejn Trump. Minn mindu d-demokrazija taħdem bis-sistema li min jiġi elett għandu ‘carte blanche’ biex jagħmel li jrid? Minn mindu d-demokrazija taħdem bis-sistema li l-interess jiġi definit minn bniedem wieħed u minn dawk, bħal Fox News, li huma interessati biss li jinċensawh?
Huwa fl-interess tal-Amerikani l-attakki kostanti kontra l-ġudikatura sempliċement għax din qed iżomm lil Trump kontabbli għal-liġi? Huwa fl-interess tal-Amerikani li grazzi għall-politika żbaljata tat-tariffi se jogħlew il-prezzijiet ta’ tant affarijiet? Huwa fl-interess tal-Amerikani l-fatt li l-Amerika qed tisfa’ dejjem aktar iżolata fil-palk internazzjonali?
Calleja qalli li qed nagħti wisq kas il-midja li dejjem ħadmet kontra Trump. Minix se niċħad li fil-midja hemm ċertu preġudizzju, anzi kważi odju lejn Trump u lejn ir-Repubblikani. Minix se niċħad li dawn jogħxew jagħtu stampa mudlama.
Il-problema li t-tħassib tiegħi dwar Trump mhux ġej minn xi CNN jew NBC jew ABC imma minn kliem Trump stess u minn kliem nies bħal Karoline Leavitt, Mike Johnson u J D Vance. Mhux xi verżjoni ċensurata, imma minn verżjoni mhux ċensurata u sħiħa fejn aktar ma’ nisma kliemhom aktar ninduna kemm Trump hu tassew perikoluż, f’kull sens tal-kelma perikoluż.
Għandi kull rispett lejn Joe Calleja bħala opinjonist anki jekk kważi qatt ma’ naqsam l-analiżi tiegħu tal-aħbarijiet internazzjonali. M’għandi l-ebda dubju li Calleja jsejjes l-argumenti tiegħu fuq il-fatti kif jarahom hu bl-aktar mod ġenwin. Madankollu nemmen li Calleja qiegħed jagħmel numru ta’ kalkoli żbaljati.
Id-dinja mhijiex maqsuma f’iswed u abjad fejn jekk int kritiku ta’ Trump ifisser li int xellugi jew liberali. Dik hija narrattiva falza li jriduna nemmnu r-Repubblikani. Ugwalment li wieħed ikun kritiku ta’ Trump ma’ jfissirx li sar xi ammiratur tad-Demokratiċi.
Nażżarda ngħid anzi li fost l-aktar kritiċi ta’ Trump kredibbli hemm nies li huma Repubblikani, konservattivi u ċertament mhux xellugin.
Dan l-artiklu deher f’In-Nazzjon tal-Ħamis 3 ta’ April, 2025.
