Matul il-laqgħa tal-Erbgħa tal-Kumitat Ornis, il-proposta tal-Federazzjoni Kaċċaturi, Nassaba, Konservazzjonisti, l-FKNK biex jinfetaħ staġun tar-rebbiegħa għall-kaċċa fuq il-gamiema ġiet approvata bl-appoġġ tal-membri kollha ħlief BirdLife Malta, li vvutat kontra, filwaqt li l-Awtorità għall-Ambjent u r-Riżorsi, l-ERA, astjeniet.
Fi stqarrija, il-BirdLife spjegat li proposti oħra tal-FKNK għaddew ukoll, inkluż waħda għall-insib tal-gamiema, li ġiet appoġġjata mill-membri kollha, inkluż l-ERA, filwaqt li BirdLife Malta vvutat kontra.
Intqal kif b’kuntrast, il-proposta li BirdLife Malta resqet aktar minn sena ilu biex tinħoloq zona ta’ protezzjoni ta’ 200 metru madwar l-iskejjel f’Malta u Għawdex, ma ġietx approvata. Kienet biss BirdLife Malta li vvutat favur din il-proposta filwaqt li l-bqija tal-membri vvutaw kontra jew astjenew.
“Filwaqt li l-bajjiet, l-arterji prinċipali, u ċ-ċimiterji għandhom dawn iz-zoni ta’ protezzjoni, huwa tal-mistħija u diżappuntanti li dawk li jpoġġu madwar il-mejda tal-Ornis — magħżulin mill-Gvern ta’ Malta — ma appoġġjawx l-inklużjoni tal-iskejjel f’din il-lista biex jipproteġu t-tfal tagħna.”
Ir-rappreżentant tal-ERA, Darrin Stevens, astjena, u qal li kellu bżonn jivverifika l-implikazzjonijiet tal-permessi ambjentali — skuża ċara wara aktar minn sena ta’ diskussjonijiet u tattiċi ta’ dewmien. Kieku mhux għall-perseveranza ta’ BirdLife Malta, din il-proposta kienet ilha li ntilfet u qatt ma ttieħed vot dwarha.
Wara r-riżultati tal-laqgħa tal-bieraħ, BirdLife Malta qed titlob lill-Gvern biex ma jiftaħx staġun tal-kaċċa fir-rebbiegħa fuq il-gamiema vulnerabbli, għaliex id-data li pprovda l-Wild Bird Regulation Unit, WBRU, kienet matematikament u xjentifikament żbaljata, u b’mod skorret ippreżentat l-gamiema bħala stabbli meta fir-realtà qed tonqos b’mod allarmanti fis-Central Eastern Flyway.
BirdLife Malta ħeġġet lill-Gvern biex ma jirriskjax li Malta teskala aktar proċeduri ta’ ksur mal-Kummissjoni Ewropea, billi tinnota li l-kaċċa fuq il-gamiema diġà hija soġġetta għal proċedura ta’ ksur, filwaqt li l-insib tal-gamiema kien waqaf fl-2011 wara ksur simili.
BirdLife Malta appellat ukoll lill-Gvern biex jogħla ‘l fuq mill-pożizzjoni assurda li ħa l-Kumitat Ornis u joħroġ l-avviż legali meħtieġ biex jipproteġi l-iskejjel u l-istudenti billi jistabbilixxi zona ta’ protezzjoni ta’ 200 metru madwarhom.
Fl-aħħar nett, BirdLife Malta insistiet li l-Gvern għandu jirriforma l-Kumitat Ornis f’kumitat ibbażat fuq ix-xjenza u b’nies kompetenti li kapaċi jagħtu pariri xjentifiċi sodi minflok ma jħallih kumitat li japprova biss dak li jordnawlu minn fuq.
