L-internazzjonali Malti, Teddy Teuma llejla kien il-protagonist ta’ Stade de Reims meta skorja l-aktar gowl importanti fis-semifinali tal-Coupe de France, it-tieni l-aktar kompetizzjoni prestiġjuża fil-futbol Franċiz fir-rebħa ta’ 2-1 kontra Cannes.
Permezz tal-gowl ta’ Teuma, Stade de Reims għaddew għall-finali ta’ din il-kompetizzjoni, u issa jilagħbu kontra ċ-champions PSG, fil-finali ta’ nhar is-Sibt, 24 ta’ Mejju li ġej.
Il-gowl tal-captain ta’ Stade de Reims, Teuma ffisser ferm aktar minn sempliċiment gowl li jpoġġi lit-tim tiegħu fil-finali tal-Coupe de France, iżda fil-mument hi l-aqwa risposta li l-Malti seta’ jagħti lill-kowċ tiegħu, Samba Diawara, hekk kif ir-relazzjoni ta’ bejnithom fl-aħħar ġimgħat ħżienet mhux ftit tant li Diawara ħareġ jikkritika lill-Malti u saħansitra ma kienx qed jilagħbu.
Illejla, Teuma reġa’ ma kienx mal-ewwel ħdax ta’ Stade de Reims, iżda daħal bħala sostitut fit-52 minuta u kellu bżonn biss sitt minuti biex isikket il-kritika li kienet qed issir fil-konfront tiegħu għaliex skorja l-gowl tar-rebħa li permezz tiegħu poġġa lil Stade de Reims finalisti tal-Coupe de France kontra PSG.
