Il-Partit Nazzjonalista jinnota l-mod effiċjenti, organizzat u mimli ħeġġa li bih l-awtoritajiet u l-istituzzjonijiet ta’ pajjiżna ħadu passi kontra l-Avukat Jason Azzopardi li aktar kmieni llum instab ħati li ħa ritratt ta’ Robert Abela u Jonathan Attard waqt li kienu f’post pubbliku.
Kien dan li ħareġ minn stqarrija tal-PN miktuba mix-Shadow Minister għall-Ġustizzja, Karol Aquilina fejn tkompli tgħid li huwa ta’ sodisfazzjon kbir li fl-aħħar l-awtoritajiet ta’ pajjiżna rnexxielhom jagħmlu prosekuzzjoni li wasslet għal sejbien ta’ ħtija mingħajr nuqqasijiet, mingħajr tkaxkir tas-saqajn u mingħajr ma kienu kompliċi ma’ dawk li huma akkużati.
Il-Partit Nazzjonalista jħeġġeġ lill-awtoritajiet u l-istituzzjonijiet kollha ta’ pajjiżna juru u jżommu l-istess ħeġġa u ritmu fil-prosekuzzjoni ta’ każijiet ċari ta’ korruzzjoni, abbuż ta’ poter, serq, frodi u money laundering, b’mod partikolari dawk li jinvolvu politiċi Laburisti korrotti u l-kompliċi tagħhom.
