Il-Gvern Ukren spjega li missila Russa laqtet il-belt ta’ Kryvyi Rih fl-Ukrajna ċentrali, b’talinqas 18-il persuna, fosthom disa’ tfal, mejtin u għexieren oħrajn midruba. L-attakk laqat żona residenzjali u kkawża ħsarat kbar f’blokki ta’ appartamenti.
Il-President Volodymyr Zelensky, li trabba f’din il-belt, qal li r-Russja qed tkompli tirrifjuta waqfien mill-ġlied.
Ir-Russja qalet li l-attakk kien immirat lejn laqgħa li kienet qed issir bejn kmandanti militari Ukreni u istrutturi tal-Punent f’restaurant, iżda ma pprovdiet l-ebda prova.
L-Ukrajna ċaħdet din l-allegazzjoni u nsistiet li kienet missila ballistika bil-mira li toqtol l-iktar nies possibbli.
Aktar tard, il-belt sofriet attakki oħra b’drones, li kkawżaw nirien u qatlu mara anzjana. Għexieren ta’ nies oħrajn sfaw midruba.
Fl-istess waqt, il-kapijiet militari tar-Renju Unit u Franza ltaqgħu ma’ Zelensky f’Kyiv biex jiddiskutu pjanijiet għal suldati tal-paċi bħala parti minn ftehim ta’ waqfien mill-ġlied.
