Robert Abela qiegħed iżarma l-istituzzjonijiet ta’ pajjiżna, waħda wara l-oħra.
Dan intqal fl-editorjal tal-ġurnal The Malta Independent, hekk kif ingħad li wara r-rapport tal-Kummissjoni Venezja li ġiegħel lill-Gvern Laburista jibda jwettaq ir-riformi, issa jidher li l-Prim Ministru qiegħed jara kif se jżarma l-istituzzjonijiet ftit ftit.
L-editur spjega li sa din il-ġimgħa stess il-grupp parlamentari Laburista approva r-riforma tal-inkjesta maġisterjali, liema riforma se tkun qed tirrestrinġi b’mod sever li ċittadin medju jitlob għal ftuħ ta’ Inkjesta Maġisterjali.
Dan filwaqt li l-editur kompla jisħaq li minkejja r-reżistenza mill-Partit Nazzjonalista, professjonisti mis-settur legali, u membri mis-Soċjetà Ċivili – il-Gvern ma wettaq ebda konsultazzjoni fuq din l-emenda.
Fl-editorjal intqal li dawn it-tip ta’ inkjesta kienu xewka kbira għall-Gvern tal-Labour u l-inkjesta tal-Vitals, li tat lura l-isptarijiet lill-poplu hija eżempju ċar ta’ dan.
Intqal ukoll kif matul dawn il-jiem sar magħruf kif l-istess Robert Abela lura fl-2023 gerger formalment mal-Kummissarju għall-Istandards u fi kliem sempliċi qal li jekk se jkomplu jaqbdu miegħu fuq l-etika kien se jemenda l-liġi hemm ukoll.
Bl-istess Kummissarju għall-Istandards ma jaqbilx mal-pożizzjoni tal-Prim Ministru u insista li tali talbiet li jsirulu huma fil-mertu tal-liġi…u jekk dawn id-drittijiet jiġu limitati jkun pass totalment fid-direzzjoni l-ħażina.
L-editur insista li l-attitudni ta’ Robert Abela hija ċara, kull talba jew kritika fil-konfront tal-Gvern Laburista huma frivoli, bla bażi u attakki abbużivi.
Dan filwaqt li fl-editorjal intqal li l-PrimMinistru lest jagħlaq u jxekkel id-dritt li wieħed jikkritika b’mod legali l-aġir tal-Gvern immexxi minnu u li kull diskors li Gvern Laburista qed isaħħaħ l-istituzzjonijiet jisfaxxa fix-xejn meta l-istess Prim Ministru jidher li jrid iżarmahom waħda wara l-oħra.
