Eluf ta’ persuni f’erbgħin belt madwar Spanja se joħorġu fit-toroq jipprotestaw biex jitolbu soluzzjoni għall-kriżi tal-akkomodazzjoni fil-pajjiż. Il-protesti f’ibliet bħall-Madrid, Barċellona, Malaga u Palma de Mallorca jistgħu jikkostitwixxu l-akbar dimostrazzjoni koordinata favur id-drittijiet għall-akkomodazzjoni li Spanja rat f’dawn l-aħħar snin.
Rapporti fil-midja Spanjola spjegaw li l-prezzijiet tad-djar li mhumiex ġodda telgħu bi 11.2% din is-sena, u ħafna residenti lokali qed isibuha diffiċli biex jixtru jew jikru proprjetajiet. Huma indikaw li hemm 3.8 miljun dar vojta madwar il-pajjiż bħala prova tat-turiżmu eċċessiv u l-pussess ta’ proprjetà sekondarja li qed jaggrava l-problema.
Id-dimostranti qed jitolbu għadd ta’ miżuri, fosthom tnaqqis fil-prezzijiet tal-kirjiet, projbizzjoni fuq kumpaniji tal-evizzjoni, u projbizzjoni li familji vulnerabbli jitkeċċew mid-djar tagħhom mingħajr li jkollhom akkomodazzjoni alternattiva.
