Marsaxlokk komplew bil-mixja pożittiva tagħhom u fl-ewwel logħba mill-aħħar ħames partiti li għandhom skedati sat-tmiem tal-Closing Round, huma għelbu lil Mosta 4-0.
Kienet wirja konvinċenti għax-Xlukkajri li permezz tagħha kisbu t-tieni rebħa konsekuttiva u f’żewġ partiti skorjaw disa’ gowls mingħajr ma soffrew gowl. Għaldaqstant meta intlagħbu l-ewwel żewġ partiti minn sitta minn match day 28, Marsaxlokk telgħu momentarjament waħedhom fl-ewwel post tal-klassifika.
Wara żewġ minuti logħob, Marsaxlokk kienu diġa’ minn fuq, b’gowl tad-difensur Arġentin Lucas Lopez. Dan il-gowl ta saħħa akbar lit-tim ta’ Enzo Potenza għall-bqija tal-logħba, u fl-24 minuta Dodo skorja t-tieni wieħed ta’ Marsaxlokk għal skor parzjali ta’ 2-0.
Tmien minuti mil-bidu tat-tieni taqsima, Dodo reġa’ għeleb lill-gowlkiper avversarju, Anse Demba għal 3-0 sabiex erba’ minuti mit-tmiem tal-partita, is-solitu Alex Tanque niżżel ismu fost l-iskorers tal-partita, biex issa dan tal-aħħar laħaq il-kwota ta’ 15-il gowl skorajt fl-ewwel staġun tiegħu jilgħab fil-Malta Premier.
