Ġimgħa wara li ġarbu diżappunt kbir, li f’temp ta’ ftit aktar minn minuta filli kienu minn fuq filli spiċċaw biex tilfu l-partita, Żabbar St Patrick bdew l-impenji tagħhom fil-Bottom Six b’rebħa ta’ 2-0 kontra Naxxar Lions.
Fil-veritá, l-iskwadra ta’ George Vella kellha l-mumenti tagħha tul id-90 minuta, iżda naqset milli tisfrutta l-opportunitajiet li huma kellhom. Bil-kontra, Żabbar St Patrick, anke jekk kellhom diversi pedini importanti nieqsa, primarjament minħabba sospensjonijiet, għarfu jkunu opportunisti u ħadu vantaġġ tal-okkazzjonijiet li ġew fuq in-naħa tagħhom.
Appena għaddew nofs siegħa logħob mill-ftuħ tal-logħba, Żabbar St Patrick fetħu l-iskor. Kienet azzjoni fejn għamel xogħol tajjeb Brian Gambarte, li għadda l-ballun lejn David Oliveira Souza, bil-ballun jgħaddi għand Diogo Tavares li b’konkluzzjoni tajba xeħet fir-rokna tax-xibka għal skor ta’ 1-0.
Fit-tieni 45 minuta, Naxxar Lions ma kienux passive, anzi ħarġu aggressivi, b’tama li jiskorjaw il-gowl tad-draw, iżda minflok kienu l-avversarji Żabbar St Patrick li skorjaw it-tieni wieħed tagħhom fil-logħba. Kienet azzjoni ta’ corner, u David Oliveira Souza li bir-ras għeleb għat-tieni darba lil Matthias Debono. Dan l-iskor baqa’ jinżamm sal-aħħar tal-logħba biex b’hekk Żabbar St Patrick fetħu l-Bottom Six tal-Closing Round fuq nota pożittiva u bir-rebħ ta’ tliet punti.
