Ħamrun Spartans kisbu t-tieni rebħa konsekuttiva, u fetħu l-impenji tagħhom f’Top Six tal-Closing Round, b’rebħa importanti ta’ 1-0 kontra Birkirkara. Qabel din il-match day, l-istripes kienu l-ewwel flimkien ma’ tliet timijiet oħra; Floriana, Marsaxlokk u Mosta u b’din is-seba’ telfa tal-istaġun fil-Malta Premier, is-sitwazzjoni dahret kompletament, b’Ħamrun Spartans issa għandhom punt wieħed vantaġġ fuq l-iskwadra mmexxija mill-kowċ Stefano D’Angelis.
Fl-istess waqt, iċ-champions għal dawn l-aħħar sentejn fil-futbol Malti, Ħamrun Spartans jinsabu żewġ punti taħt il-leaders tat-Top Six, Marsaxlokk. Wieħed ma jridx jinsa’ pero li għada, il-Ħadd, Floriana jistgħu jitilgħu pari punti max-Xlukkajri, kemm il-darba huma jirbħu d-derby l-antik ta’ Malta kontra Sliema Wanderers.
Id-dwell tal-lum bejn Birkirkara u Ħamrun Spartans kien wieħed missielet, b’episodji li nisslu kritika mill-partitarji taż-żewġ naħat. Birkirkara ħadu daqqa ta’ ħarta meta fit-63 minuta, l-internazzjonali Malti, Neil Micallef żamm il-ballun b’idu. Mill-freekick sussegwenti, kien Roko Prsa li pinġa l-ballun fir-rokna ta’ fuq tax-xibka biex fetaħ l-iskor u skorja l-gowl li eventwalment għamel id-differenza kollha fil-ġurnata.
Quddiem dan ix-xenarju, il-logħba saret itqal għal Birkirkara, u fil-ħin miżjud mir-referee tal-logħba, tkeċċa ukoll il-captain ta’ Birkirkara, Alex Satariano.
