Internazzjonali Kurżitajiet

Il-Vatikan iniedi logħba ġdida ta’ Minecraft għat-tfal imfassla fuq il-Bażilika ta’ San Pietru

Uffiċjali tal-Vatikan għadhom kemm ħabbru ‘Peter is Here’, logħba bażata fuq Minecraft li tippermetti lit-tfal jesploraw u jitgħallmu iżjed dwar l-istorja tal-Bażilika ta’ San Pietru fil-Vatikan.

Il-logħba, żviluppata f’kollaborazzjoni ma’ Minecraft Education Program ta’ Microsoft, hi parti miċ-ċelebrazzjonijiet tal-Ġublew tal-Vatikan u għandha l-għan li tintroduċi l-ġenerazzjonijiet iż-żgħar għat-teżori u l-patrimonju kulturali tagħha.

Matul il-logħba li tista’ ddum bejn 45 u 60 minuta, l-istudenti se jużaw għodod ta’ Minecraft u apparat ibbażat fuq l-AI biex ilestu proġetti differenti ta’ restawr f’postijiet varji madwar il-Bażilika ta’ San Pietru. Flimkien mas-Sanpietrini, grupp ta’ karattri li jaħdmu fil-Vatikan u li xogħolhom hu li jieħdu ħsieb il-manutenzjoni tal-Bażilika, l-istudenti se jiltaqgħu ma’ punti bħall-Obelisk tal-Vatikan, il-Qabar ta’ San Pietru, il-Baldakkin u kolonna partikolari fin-nava ewlenija tal-Bażilika li se jkollhom jirrestawrawha.

Għal kull biċċa xogħol, it-tfal se jkollhom japplikaw dak li se jitgħallmu dwar il-preservazzjoni u r-restawr biex dawn il-punti madwar il-Vatikan jerġgħu lura għad-dehra u l-kundizzjoni oriġinali tagħhom. U huma u jaħdmu fuq il-proġett, it-tfal jistgħu jiddokumentaw il-progress tagħhom u jirriflettu fuq l-importanza ta’ xogħol fi grupp.

Il-proġett beda mill-ħolqien ta’ ‘kopja diġitali’ permezz tal-AI tal-Bażilika ta’ San Pietru fil-Vatikan. Għal dan il-proġett, Microsoft ikkollaboraw ma’ Iconem, kumpanija Franċiża li toħloq riċerki diġitali ta’ monumenti storiċi globali bit-tekniki tal-fotogrammetrija avvanzata u l-AI.

Il-Laboratorju AI for Good ta’ Microsoft ipprovda t-teknoloġija meħtieġa biex jipproċessaw u janalizzaw id-dejta tal-fotogrammetrija li ġabru u meta kienet qed titnieda din il-kopja diġitali, it-tim induna li kien hemm opportunità biex joħolqu verżjoni speċjali għall-istudenti wkoll.

Waħda mill-isfidi ewlenin waqt id-disinn tal-logħba ‘Peter is Here’ kienet il-ħolqien tal-mudelli simetriċi fl-art tal-irħam tal-Bażilika filwaqt li jinżamm il-kunċett kwadru ta’ Minecraft. L-iżviluppaturi kellhom jiżguraw li l-mużajk ikun rappreżentat b’mod preċiż filwaqt li jinżamm l-ispirtu ta’ Minecraft.

Minħabba li l-Bażilika ta’ San Pietru hija spazju enormi u vast, it-tkabbir tal-kostruzzjoni reali tal-knisja żiedet sfida oħra.

Il-‘kopja diġitali’ għenet f’dawn l-isfidi billi inkorporat il-bini fil-logħba b’mod li t-tim ta’ Minecraft seta’ jaħdem minn mudell dettaljat u reali għall-aħħar. Minn hawn, l-iżviluppaturi użaw l-AI biex jibnu esperjenza tal-logħba meraviljuża.

Il-logħba hija maħsuba għall-istudenti ta’ età minn 8 sa 18-il sena u ssemmiet ‘Peter is Here’ għax tinkludi narrativa dwar l-iskoperta tal-qabar ta’ San Pietru fil-logħba.

L-istudenti jitgħallmu wkoll dwar is-sejba ta’ ġebla fis-snin 50 li kienet ikkonfermat li l-qabar ta’ San Pietru kien tassew jinsab fil-Bażilika – element importanti għaliex San Pietru kien l-ewwel Papa tal-Knisja Kattolika. Din l-isfida arkeoloġika tgħin biex titwessa’ l-esperjenza edukattiva u tippromwovi l-kurżità permezz tal-iskoperta.