Matul din il-ġimgħa 19-il għaqda żagħżugħa flimkien ukoll mal-Kunsill Nazzjonali Żgħażagħ ikkritikaw id-deċiżjoni tal-Prim Ministru Robert Abela u l-Grupp Parlamentari Laburista li emendaw il-liġi tal-Inkjesti Maġisterjali.
Dan hekk kif insistew li filwaqt li dan qed jagħti daqqa lit-trasparenza, l-kontabbiltà u s-saltna tad-dritt f’Malta, preżentament dawn id-deċiżjonijiet imbuttati minn Robert Abela ħolqu preċedent perikoluż ħafna li qed jhedded l-integrità tad-demokrazija f’pajjiżna.
Filwaqt li ż-żgħażagħ saħqu li l-poplu ħaqqu governanza aħjar, spjegaw li s-sistema ġuridika ta’ pajjiżna kienet diġa qiegħda tiffunzjona.
Il-KNŻ spjegat li id-dritt ta’ ċittadin privat li jitlob inkjesta maġisterjali diġà joffri biżżejjed protezzjoni għas-suspettat.
Dan għaliex l-Artiklu fil-kodiċi kriminali jisħaq ċar u tond li qabel ma tinfetaħ inkjesta fuq talba tal-privat hemm proċeduri diġà sostanzjali qabel ma Maġistrat jiddeċiedi jekk jilqax it-talba jew le.
Huma komplew li bil-proċedura ġdida fil-liġi, qed titneħħa kompletament l-awtonomija tal-Maġistrat Inkwerenti li jiddetermina jekk hemmx lok għal inkjesta fuq talba tal-privat.
Dan iddeskrivewh bħala aġir dispreġġjattiv għall-irwol u l-indipendenza tal-Maġistrat filwaqt li insistew li l-prinċipju tas-separazzjoni tal-poteri b’dan il-mod jidgħajjef.
Għaldaqstant, wara tali stqarrija, is-Sibt filgħodu Net News mar proprju jistaqsi lis-Segretarju Parlamentari responsabbli miż-żgħażagħ, Keith Azzopardi Tanti – fejn qabel xejn insista li hu qiegħed jisma’ miż-żgħażagħ.
Madanakollu meta mistoqsi għalxiex il-Gvern baqa’ jsabbat saqajh u mhux qed jisma’ minn dawn l-għaqdiet – huwa insista li hemm aktar għaqdiet simili li kuntenti bit-tmexxija tal-pajjiż.
Hekk kif allega għal aktar minn darba li l-inkjesti maġisterjali tal-privat kienu qed ikunu motivati minn esponenti tal-Partit Nazzjonalista, persuna tasal awtomatikament għad-domanda jekk il-Gvern Laburista u Robert Abela mexxewx b’ħeffa liema bħala fuq din l-emenda fil-liġi akkost ta’ kollox minħabba interessi partiġjani….bid-Deputat tal-Labour ma jiċħadx.
Għaldaqstant kollox qiegħed jindika li kawża ta’ interessi partiġjani u mhux għal interessi biex jissalvagwardjaw l-interessi tal-poplu u l-familji Maltin u Għawdxin, il-Grupp Parlamentari Laburista vvota favur bidla fil-liġi għall-interessi tagħhom u ta’ sħabhom.
Dan minkejja l-appelli taż-żgħażagħ, akkademiċi, professjonisti, eks Dekan tal-Fakultà tal-Liġi u eks Prim Imħallfin.
