Din il-ġimgħa kienet l-agħar ġimgħa għas-swieq internazzjonali sa minn żmien il-Covid. Dan hekk kif it-tħabbira ta’ Trump li se jdaħħal fis-seħħ tariffi iebsin ħolqot terremot finanzjarju globali.
Mil-lum, daħlet fis-seħħ it-tariffa minima ta’ 10 fil-mija. U mid-9 ta’ April jidħlu fis-seħħ il-kumplament tar-rati li qed jimponi l-President Amerikan.
Intant, qed jiġu pjanati numru kbir ta’ dimostrazzjonijiet kontra l-President Donald Trump madwar l-Istati Uniti. Protesti oħrajn se jkunu qed isiru f’Londra u anke fi bliet Kanadiżi.
Fl-Istati Uniti kritiċi tal-President Donald Trump u l-biljunarju Elon Musk qed jippjanaw li jingħaqdu fi protesta madwar l-Istati Uniti sabiex jipprotestaw kontra l-azzjonijiet tal-amministrazzjoni.
Dawn is-sensiela ta’ protesti bit-tema “Hands Off!” qed jiġu ppjanati minn aktar minn 150 grupp, inklużi attivisti tad-drittijiet ċivili, Unions tal-ħaddiema, avukati, u għaqdiet tal-LBGTQ fost l-oħrajn.
Il-protesti huma ppjanati propju f’Washington D.C., fosthom fin-naħa tal-Kapitol – dan apparti f’postijiet oħra madwar il-50 stat Amerikan.
Apparti t-tema prinċipali rigward ir-rati ġodda ta’ tariffi, li skont l-kritiċi ta’ Trump, ser jiżolaw l-Istati Uniti mill-kumplament tad-dinja, d-dimostranti qed jattakkaw ukoll il-passi tal-amministrazzjoni Trump, fosthom fuq it-tkeċċija ta’ eluf ta’ ħaddiema tal-Gvern, u kontra l-programm ta’ deportazzjoni tal-massa li qed isseħħ preżentament fil-pajjiż fost l-oħrajn.
Intant il-President tal-Istati Unitit saħaq li dawn huma protesti li qed isiru sabiex tiġi imminata l-ħidma tal-Gvern – hu semma’ wkoll kif kienu inqalgġu bosta protesti li ħallew straġi sħieħa fiż-żmien l-ewwel terminu tiegħu bħala Presidnet tal-Istati Uniti. Minħabba li, skont hu, it-tir tax-xellug u tad-demokratiċi hu biss li jagħmlu kemm jista’ jkun ħsara lill-pajjiż.
