Dawk li jsegwu l-futbol lokali, żgur li għadhom jiftakru lill-winger offensiv mill-Kolombja, Angel Torres li fl-istaġun 2022/23 kien lagħab għal staġun wieħed f’Malta ma’ Balzan. Staġun wieħed f’Malta kien biżżejjed għaliħ biex ħalla impressjoni mill-aqwa fuq il-futbol lokali, tant li fl-istaġun ta’ wara hu kien trasferit għal ma’ Central Coast Mariners fl-A-League tal-Awstralja.
Fl-uniku staġun f’Malta, Torres kien lagħab 22 partita fil-Kampjonat ma’ Balzan u skorja 14-il gowl. Dak kien staġun mill-aqwa għal Balzan, taħt it-tmexxija ta’ Oliver Spiteri tant li l-iskwadra kienet kisbet post fl-Ewropa fl-istaġun ta’ wara.
Fil-bidu tal-istaġun, 2023/24, Torres kien lagħab erba’ partiti ma’ Balzan fil-UEFA Ewropa Conference League, u wara li l-klabb Malti kien eliminat mill-Ewropa, il-Kolombjan kien inħeles mill-kuntratt tiegħu ma’ Balzan biex iffirma fuq free transfer mal-klabb Awstraljan ta’ Central Coast Mariners.
Dawn tal-aħħar, f’dak iż-żmien, bħala parti mill-amministrazzjoni tal-klabb, kellhom lill-Malti-Awstraljan, Anton Tagliaferro li llum m’għadux jifforma parti mit-tmexxija tal-klabb iżda għadu President ta’ Balzan.
L-akkwist ta’ Torres minn Central Coast Mariners kien suċċess kbir, iżda lejla f’Marzu tas-sena l-oħra, waqqaf ħesrem il-karriera tal-plejer. Dan għaliex fl-24 ta’ Marzu 2024, filgħaxija kien ħareġ ma’ grupp ta’ plejers tal-istess tim u f’nightclub f’Terrigal fuq il-Kosta Ċentrali, hu kien iltaqa’ ma’ tfajla, li dak iż-żmien kien għad kellha 21 sena.
Aktar tard f’dak l-istess lejl, l-eks plejer ta’ Balzan kien ħa lit-tfajla d-dar tiegħu, u wara hi kienet allegat li ġiet stuprata.
Waqt ġuri li dam għaddej disa’ t’ijiem, il-prosekuzzjoni allegat li Torres neħħa ċ-ċinturin tat-tfajlau kellu x’jaqsam sesswalment magħha waqt li hi għajtet “le, le le”.
Fil-Qorti t-tfajla qalet li rrnexxilha taħrab mid-dar, u meta kienet barra, bdiet tgħajjat għall-għajnuna. Torres, skont dak li ħareġ mill-Qorti, ħareġ warajha, u kien qalha li “inti se tħassarli l-karriera”.
Torres ċaħad dawn l-allegazzjonijiet fil-qorti, u fost l-oħrajn wieġeb mhux ħati ta’ kopulazzjoni sesswali mingħajr kunsens.
L-attakkant ġie mwaqqaf mill-irwol tiegħu mal-Mariners wara l-arrest tiegħu f’Mejju 2024, wara li ngħaqad mat-tim fil-bidu tal-istaġun preċedenti tal-A-League Irġiel u skorja 13-il gowl fi 23 logħba.
Fit-tmiem tal-ġuri, il-bieraħ, il-ġurija tal-Qorti Distrettwali ta’ NSW f’Gosford sabet lill-attakkant ta’ Central Coast Mariners mhux ħati tal-akkużi kollha kontrih wara li ddelibera għal tliet sigħat. Għaldaqstant Angel Torres ġie illiberat li stupra mara żagħżugħa li ħa d-dar minn nightclub.
