Investigazzjoni mill-Pulizija b’rabta ma’ allegat traffikar ta’ droga f’Għawdex wasslet għall-arrest ta’ Taljan ta’ 36 sena.
Wara informazzjoni dwar l-allegat suspettat, il-Pulizija arrestat lir-raġel il-Ħamis waranofsinhar f’residenza fi Triq ix-Xagħra, Marsalforn, fil-limiti taż-Żebbuġ.
Minn tfittxijiet li saru fir-residenza nstabu madwar 15-il kilogramma sustanza suspettata kannabis, maqsuma fi qratas lesti biex jinbiegħu, fejn il-valur fis-suq ilaħħaq madwar €150,000, kif ukoll mat-€3,000 fi flus kontanti.
L-akkużat tressaq fil-Qorti ta’ Għawdex quddiem il-Maġistrat Simone Grech u baqa’ miżmum taħt arrest.
