Xufier ta’ minivan inħeles minn akkużi ta’ korruzzjoni ta’ minuri wara li Qorti qieset il-verżjoni tiegħu kienet aktar kredibbli minn dik tal-allegata vittma, tifel ta’ sitt snin. Iċ-ċittadin Indjan li ismu ma jistax jissemma b’ordni tal-Qorti, tressaq il-Qorti f’Ġunju tal-2023 fejn kien mixli li wettaq atti sesswali mhux kunsenswali fuq it-tifel. Huwa kien mixli wkoll li saq mingħajr liċenzja valida.
L-allegat vittma xehed fil-proċeduri qal li qabel l-inċident kien juża’ t-trasport tal-iskola u llum il-ġurnata, ommu twasslu l-iskola. Qal li kien ipoġġi kullimkien fuq il-vann, iżda l-aktar fuq quddiem ħdejn ix-xufier, bl-akkużat fuq ix-xellug tiegħu.
L-akkużat kien ix-xufier preċedenti tal-minivan iżda ġie mibdul hekk kif il-liċenzja tiegħu kienet se tiskadi. Huwa akkumpanja lix-xufier il-ġdid u għallmu r-rotta. Skont it-tifel, l-akkużat “kien idejqu” hekk kif kien imisslu rasu u l-partijiet privati tiegħu.
Fix-xhieda tiegħu, it-tifel ta’ sitt snin qal li x-xufier il-ġdid ma rax lill-akkużat imissu. It-tifel qal ukoll li kien qal lill-akkużat biex jieqaf u li kien irrabja miegħu wara li qal lil missieru. It-tifel qal li tpoġġa fuq quddiem tal-minivan wara li kien involut fi ġlieda ma’ tifel li kien sena ikbar minnu, fuq il-karti tal-Pokémon.
Insista li kien l-akkużat li ġiegħlu joqgħod bilqiegħda fuq quddiem, u allega li kien “irrabjat” dwar l-inċident filwaqt li l-akkużat kien ikun “kuntent”. Waqt il-kontro-eżami, it-tifel qal li l-kap tal-iskola tat struzzjonijiet lis-sewwieq biex ipoġġih fuq quddiem wara li ġġieled ma’ tifel ieħor fl-isports day.
Semma wkoll ħabib ieħor li kien niżżel il-qliezet u espona lilu nnifsu quddiem tfal oħra. Il-vittma allega li dan il-ħabib l-ieħor kien “ġiegħlu” jesponi lilu nnifsu. L-allegat vittma qal ukoll li ġieli kien jilbes iċ-ċinturin tas-sigurtà u drabi oħra, ma kienx.
It-tifel qal li l-ġenituri tiegħu ġew infurmati li kellu joqgħod fuq quddiem, peress li kien evidenti li kien involut fi ġlied ġewwa l-iskola. Xehed l-ispettur tal-Pulizija Eman Hayman li missier it-tifel kien mar l-g
Għassa tal-Imsida u rrapporta l-allegat inċident fejn allegatament ix-xufier mess lil ibnu.
L-ispettur qal li l-missier kien mar jiġbor lit-tifel dakinhar u nnotah iġib ruħu “b’mod stramb”. It-tifel imbagħad qal lil missieru li x-xufier kien mess lilu b’mod indiċenti. Xehed ukoll missier it-tifel u qal lill-Qorti li kien jgħix barra minn Malta u kien jiġi kull tant żmien.
Dakinhar, kien sejjer l-iskola biex jiġbor lit-tifel u ltaqa’ mal-akkużat u qal li ħadlu b’idejh. L-akkużat u x-xhud tkellmu dwar l-imġiba ħażina tat-tifel u r-raġuni għaliex kellu joqgħod bilqiegħda fuq quddiem tal-minivan.
Ir-raġel xehed li wara li dakinhar ġabar lil ibnu, ħadu biex jieħu xi ħaġa x’jiekol, bit-tifel isostni li dak ix-xufier kien imissu u jgħawwiġlu l-karti tal-Pokémon. Ir-raġel ħadu l-għassa tal-pulizija biex jagħmel rapport.
Waqt il-kontro-eżami, ir-raġel sostna li kellu relazzjoni “unika u speċjali” bejnu u l-minuri, u kien għalhekk li qatt ma qal lil ommu. Ommu kkonfermat li t-tifel qatt ma fetaħ ħalqu fuq l-inċident u kien l-eks raġel tagħha li informaha meta marru jressqu r-rapport.
Il-mara qalet ukoll lill-Qorti li s-sewwieq irrapporta l-imġiba ħażina tat-tifel diversi drabi u għal din ir-raġuni ġie mġiegħel joqgħod fuq quddiem bejn iż-żewġt irġiel. Xehdet l-assistent kap tal-iskola li qalet li s-sistema tat-trasport tal-iskola ma kellha x’taqsam xejn mal-iskola u kienet sistema użata mill-ġenituri.
Ix-xhud qalet li saret taf bl-inċident mill-ġenituri tat-tifel u l-kumpanija li topera t-trasport hija responsabbli għal dak li jiġri fil-vann. Ix-xhud qalet li bejn il-perjodu Diċembru 2023 u l-Għid 2023 kien hemm żewġ xufiera: wieħed isuq u ieħor bilqiegħda fuq quddiem.
Xehdet ukoll li ma kienx hemm ilmenti dwar ix-xufier, iżda kien hemm diversi ilmenti dwar it-tfal li jużaw it-trasport tal-iskola peress li mhumiex sorveljati. Waqt il-kontro-eżami, il-mara kkonfermat li xufier kien ilmenta dwar l-imġiba ħażina tal-allegat vittma fit-trasport tal-iskola.
Hija kkonfermat ukoll li t-tifel ġie mqiegħed fuq quddiem fuq ir-rakkomandazzjoni tagħha u l-ġenituri.
L-akkużat ġie Malta biex jaħdem bħala xufier, iżda wasal proprja waqt il-pandemija tal-Coronavirus. Huwa xehed li huwa gradwat fil-finanzi u għandu MBA, u kien se jibgħat 80% tad-dħul tiegħu lill-familja tiegħu lura d-dar.
Spjega wkoll li għal dawn 10 snin kien f’relazzjoni stabbli ma’ mara u ried jistabbilixxi ruħu Malta u jiżżewweġ. Ir-raġel qal kif kien kiseb ix-xogħol tiegħu u li min iħaddmu kien għallmu r-rotta. Meta min iħaddmu kien qed isuq hu, it-tfal kienu jġibu ruħhom sew, iżda meta kien fuq ir-rotta t-tfal rari kienu jisimgħuh.
Ma kien hemm l-ebda superviżjoni fuq il-minivan bit-tfal spiss jargumentaw u jidħlu fi ġlieda. Huwa ddeskriva lill-vittma bħala l-aktar wieħed imqareb fost it-tfal, u żied li diversi drabi kien ikollu jwaqqaf il-vann biex it-tfal jikkalmaw.
Is-sewwieq xehed li kien abbużat verbalment mit-tifel ta’ sitt snin li spiss kien juża lingwaġġ ħażin u ġesti offensivi. L-akkużat irrapporta lit-tifel diversi drabi lin-nanna u lill-ġenituri tiegħu. Semma li darba, omm it-tifel infurmatu li kien se jinġabar minn missieru.
Dan l-għada li l-allegat vittma ġġieled ma’ tifel ieħor. Ġie deċiż li t-tifel l-ieħor ipoġġi fuq quddiem fi triqtu lejn l-iskola filwaqt li l-allegat vittma ġie imqiegħed fuq quddiem waranofsinhar. Qal li missier it-tifel kien irrabjat għalih meta informah dwar il-ġlieda, u ħass li ibnu kellu aktar ġrieħi mit-tifel l-ieħor.
Fix-xhieda tiegħu, l-akkużat qal li missier it-tifel x’aktarx ma kienx jarah f’dawl tajjeb peress li kien Indjan u kien jipprattika l-Ħinduiżmu, u żied li n-nanna materna tat-tifel kienet għamlet diversi mistoqsijiet personali.
Wara l-inċident tal-ġurnata tal-isports, il-kap tal-iskola qalet lis-sewwieq li l-vittma għandu dejjem joqgħod bilqiegħda fuq quddiem, in-nuqqas li jagħmel dan, l-istorja kellha tiġi rrappurtata lill-iskola. Omm it-tifel kienet issuġġeriet dan ukoll, u dan kien ikkorroborat minn messaġġi fuq WhatsApp.
Ix-xufier qal ukoll li t-tifel ma kienx jieħu gost jilbes iċ-ċinturin tas-sigurtà u kien jitfa’ l-karti tal-Pokémon tiegħu lejn it-tfal bilqiegħda warajh, bit-tfal ‘jiġġennu’ biex jiġbruhom. Is-sewwieq kellu wkoll recordings tat-tifel juża lingwaġġ offensiv kontrih u tfal oħra.
Il-kumpanija kienet impjegat xufier ieħor hekk kif il-liċenzja tal-akkużat kienet se tiskadi. L-akkużat kien qed jgħallem lis-sewwieq il-ġdid ir-rotot. Xehed li darba l-allegat vittma tefa’ l-ħwejjeġ ta’ taħt fuq ix-xufier il-ġdid.
Insista wkoll li hu qatt ma mess lit-tifel b’mod indiċenti, u qal li minn fejn jiġi hu, kienu jqisu lill-anzjani u lit-tfal bħala “allat jew anġli” u “qatt ma kienu jagħmlu xi ħaġa bħal din”. Is-sewwieq il-ġdid xehed ukoll.
Qal li hu wasal Malta fi Frar 2023 u beda jaħdem bħala trainee f’April 2023. L-akkużat għallmu r-rotot u kkonferma li kien qed isuq. Ir-raġel qal li l-akkużat qagħad ħdejh waqt li t-tfal kienu fuq wara. Xehed ukoll li l-allegat vittma ġie mġiegħel joqgħod fuq quddiem mill-għalliema u l-ġenituri tiegħu peress li ta’ spiss kien involut fi ġlied ma’ tfal oħra. Ir-raġel xehed ukoll li t-tifel uża lingwaġġ u ġesti offensivi.
Xehed min iħaddem lir-raġel li l-akkużat kien għadu jaħdem għalih iżda evita kull xogħol li jinvolvi minorenni minħabba l-allegat inċident. Qal li qatt ma rċieva lmenti dwaru. Persuna li jħaddem lin-nies fi ħdan l-istess kumpanija, u li jirrekluta ċittadini Indjani, qal li rċieva ilmenti dwar l-akkużat meta kien tard minħabba konġestjonijiet tat-traffiku, iżda dan kien barra mill-kontroll tiegħu.
Barra minn hekk, ix-xufiera lmentaw dwar l-imġiba tat-tfal fuq it-trasport tal-iskola, peress li spiss iġġieldu waqt li kienu trasportati u kienu jobżqu lil xulxin. Ix-xhud qal li l-allegat vittma kien dejjem ifittex l-inkwiet u jiġġieled ma’ tfal oħra tal-iskola. Żied jgħid li ġenituri ta’ tfal oħra kienu spiss irrabjati mal-akkużat peress li wliedhom kienu jispiċċaw bi ġrieħi.
Fil-kunsiderazzjonijiet tagħha, il-Qorti osservat li l-każ kien jistrieħ fuq il-verżjoni tal-ġrajjiet tal-minuri kontra dik tal-akkużat. Osservat li t-tifel kien intelliġenti ħafna minkejja l-età żgħira tiegħu. Madankollu, kien diġà ġie espost għal ġesti u lingwaġġ offensivi. Dan ħareġ b’mod ċar mill-imġiba tiegħu ma’ tfal oħra, sostniet il-Qorti, peress li poġġiet l-imġiba tat-tifel f’kuntest.
Il-Qorti sostniet li l-verżjoni tal-avvenimenti tal-akkużat kienet konsistenti u kredibbli, u tefgħet dawl fuq il-karattru tal-minuri. Barra minn hekk, il-Pulizija ma sabu xejn fuq il-mobile tiegħu li seta’ kien inkriminanti.
It-tifel ikkontradixxa lilu nnifsu waqt ix-xhieda, osservat il-Qorti, li saħqet li l-minuri eventwalment ammetta li kien involut f’diversi ġlied fuq il-vann tal-iskola. L-akkużat żamm l-innoċenza tiegħu tul il-proċeduri u pprovda wkoll lill-Qorti b’verżjoni dettaljata tal-avvenimenti, osservat il-Qorti, li żiedet li r-raġel enfasizza l-kwistjonijiet dixxiplinarji li kien ilu jiffaċċja u mix-xhieda tiegħu ħareġ li l-minuri għamel il-ħajja tar-raġel infern.
Il-Qorti ssottolinjat ukoll li kien hemm problema fit-trasport tal-iskola bl-assistent kap xehed li “t-tfal huma tfal” u kienu jirċievu lmenti ta’ kuljum dwar l-imġiba tagħhom, iżda fil-verità, ma kien hemm l-ebda superviżjoni.
Dan jitqies bħala nuqqas “kbir” mill-iskola inkwistjoni bil-Qorti tissottolinja li s-sewwieq kien responsabbli li jsuq lit-tfal b’“mod sikur u responsabbli”. Hija qieset ukoll l-ispjegazzjoni tal-iskola dwar in-nuqqas ta’ superviżjoni bħala “inaċċettabbli” li tgħid li għandu jkun hemm adult responsabbli li jissorvelja l-istudenti u d-dixxiplina.
Il-Qorti ssuġġeriet li dan l-irwol jista’ jittieħed ukoll minn individwi anzjani li jkunu impenjati u volontarji fil-komunità. Il-Qorti qalet li waqt il-proċeduri ħareġ biċ-ċar li t-tifel kien problematiku fl-iskola u fuq it-trasport tal-iskola, u dawn il-fatturi kollha kkontribwew biex jivvinta din l-istorja.
Mill-provi rriżulta wkoll li ma kienx minnu li l-akkużat kien qed isuq mingħajr liċenzja tas-sewqan valida.
Il-Qorti illiberat lir-raġel minn kull akkuża u ordnat li tintbagħat kopja tas-sentenza lill-Kummissarju għat-Tfal, lill-Ministru tad-drittijiet tat-tfal u lis-Segretarjat għall-Edukazzjoni Kattolika.
L-avukat tal-AĠ Danika Vella mexxiet il-prosekuzzjoni flimkien mal-Ispetturi Dorianne Tabone u Eman Hayman. L-avukati Jason Azzopardi, Alessandro Farrugia u Kris Busietta assistew lill-akkużat. Il-Qorti kienet ippreseduta mill-Maġistrat Claire Stafrace Zammit.
