Andrew Robert Coles, espert tal-qorti imqabbad bħala parti mill-inkjesta maġisterjali dwar il-konċessjoni tal-isptarijiet, xehed nhar it-Tlieta li kien sottokuntrattat minn Jeremy Harbinson biex jaħdem fuq ir-rapport.
Huwa qal li fil-Qorti li ma kellu x’jaqsam xejn mal-ordnijiet ta’ ffriżar fil-konfront ta’ kull akkużat, li tinkludi l-ordni ta’ ffriżat ta’ 30 miljun ewro fil-konfront tal-eks Prim Ministru Joseph Muscat. Coles xehed permezz ta’ video link li kienet interotta diversi drabi minħabba problemi kbar fil-link, f’seduta li fiha kellhom jixhdu tliet esperti u spiċċa biex xehed wieħed biss minħabba d-dewmien minħabba problemi fl-IT.
Cole qal ukoll li huwa ħalefx taħt ġurament dwar l-involviment tiegħu fil-kumpilazzjoni tar-rapport li għamel hekk kif għal seduta sħiħa kien qed jiġi mistoqsi mill-avukati tad-difiża. Il-proċeduri li saru t-Tlieta quddiem l-Imħallef Edwina Grima, kienu dwar il-kontestazzjoni minn naħa tal-akkużati dwar diversi ordnijiet ta’ ffriżar.
Fis-seduta preċedenti, l-avukat difensur Vincent Galea, ippreżenta nota fil-Qorti Kriminali fejn talab li jixhdu s-26 espert l-ieħor kollha involuti. In-nota ġiet ippreżentata lill-Qorti fir-rigward tal-akkużati kollha, mhux biss l-eks Prim Ministru Joseph Muscat.
L-Avukat Galea qal lill-Qorti li peress li Harbinson u Vincent Bradley m’huma qed juru l-ebda interess li jixhdu, jeħtieġ li jixhdu s-26 espert l-ieħor. Andrew Robert Coles qal li hu kien involut fil-pubblikazzjoni tar-rapport ta’ inkjesta maġisterjali, li ġie konkluż mill-espert maħtur mill-Qorti Jeremy Harbinson.
Il-qorti kienet ibbażat l-ordnijiet ta’ ffriżar tagħha kontra l-akkużati fuq ir-rapport. L-avukati difensuri kienu suspettużi dwar ix-xhud, dwar jekk kienu hu li qed jaqta’ l-link u l-avukat Vincent Galea talbu lil Coles jikkonferma jekk kienx waħdu fil-kamra. Huwa wieġeb li kien waħdu.
L-espert qal li ma jiftakarx li ħalef taħt ġurament fuq rapport ta’ inkjesta Waqt il-proċeduri, l-avukat difensur Stefano Filletti staqsa lil Coles jekk ħalifx taħt ġurament fl-involviment tiegħu fir-rapport. “Ma niftakarx,” wieġeb ix-xhud.
B’reazzjoni għal dan, l-avukat difensur Franco Debono rrimarka li ċerta paġna tar-rapport tal-inkjesta kienet tgħid ċar u tond li Coles kien ħalef bil-ġurament, speċifikament, “fuq il-bibbja” u li dan il-ġurament kien mogħti mill-maġistrat inkwirenti.
Meta mistoqsi mill-ġdid dwar il-kwistjoni, huwa żamm mal-fatt li ma setax jiftakar. L-Avukat Debono qal lix-xhud li dawn il-ġrajjiet seħħew inqas minn sena ilu, għalhekk m’għandux ikollu problema biex jiftakar il-fatti.
Fi sforz biex tiċċara l-kwistjoni, l-Imħallef Grima staqsietu biex ikun ċar: “Int ħlift taħt ġurament fuq ir-rapport ippubblikat?” u x-xhud għal darb’oħra kkonferma li ma kellu ebda tifkira tal-ġrajja. Madankollu, id-dokument imsemmi fil-qorti mill-avukat Franco Debono, kien iddikjara b’mod ċar mod ieħor.
L-espert saħaq li ma kellu ebda ‘say’ dwar ir-rapport finali Mistoqsi dwar ix-xogħol preċedenti tiegħu, Coles qal li kien kuntistabbli ditektif għal dawn l-aħħar 14-il sena fir-Renju Unit. Huwa qal lill-qorti li kien sottokuntrattat minn Harbinsons Forensics Ltd u li Jeremy Harbinson kien ikkuntattjah direttament. Harbinson’s Forensics Ltd ħallsuh għas-servizzi tiegħu permezz ta’ kumpanija oħra.
Fir-rapport, Harbinson iddikjara li x-xogħol tax-xhud sar taħt is-superviżjoni tiegħu, li Coles ikkonferma. Ix-xhud qal lill-qorti li l-persuna li tassew trid tiġi kkuntattjata fir-rigward tar-rapport hija Harbinson, kumment li l-avukati tad-difiża daħqu sarkastikament għalih.
Meta mistoqsi dwar ir-rwol tiegħu fir-rapport, Coles qal li espert ieħor tal-qorti, Samuel Sittlington, kien avviċinah u inkarigah jinvestiga l-korruzzjoni fl-arranġamenti tal-gvern marbuta mal-każ tal-vitals. L-avukat difensur Vincent Galea staqsa lil Coles dwar l-involviment tiegħu fil-konklużjoni tal-ammont speċifiku tal-ordni ta’ iffriżar ta’ €30 miljun tal-eks Prim Ministru, Joseph Muscat.
Huwa wieġeb li ma kienx jaf kif ġiet ikkalkulata s-somma, jew min kien involut fid-deċiżjoni finali. Andrew Roberts Coles kompla jgħid lill-qorti li kien involut biss fl-abbozzi bikrija fil-kumpilazzjoni tar-rapport. Kien ċar li qal li ma kienx involut fl-eżitu tar-rapport finali iżda wara ammetta li rah.
L-avukat difensur Franco Debono staqsa lix-xhud b’rabta mal-ordnijiet ta’ iffriżar ta’ €20 miljun maħruġa għall-akkużati Jean Farrugia u Kevin Deguara. Huwa wieġeb li hu wkoll ma kienx involut fil-kalkolu tal-ordnijiet tal-iffriżar tal-ebda wieħed mill-akkużati.
Meta ġie interrogat għall-ewwel darba, ix-xhud ikkonferma li qatt ma ġie Malta b’rabta mal-każ Vitals. Madankollu, instema’ li x-xhud tabilħaqq ġie Malta b’rabta ma’ investigazzjoni oħra, iżda mhux b’rabta mal-każ Vitals.
Minkejja dan, aktar tard ix-xhud ikkonferma li l-espert tal-qorti Samuel Sittlington, kien ta struzzjonijiet lil Coles biex jakkumpanjah fit-tfittxija fir-residenza ta’ Muscat, waqt li kien Malta jassisti f’investigazzjoni separata. Is-seduta ġiet aġġornata għas-16 ta’ Lulju fid-9.30pm.
