Il-prosekuzzjoni fil-proċeduri dwar l-impjieg fantażma ta’ Melvin Theuma li ngħata mal-gvern talbu għar-raba’ darba li jerġa’ jiddaħħal bħala xhud. It-talba qed issir minkejja li l-middleman fil-qtil tal-ġurnalista Daphne Caruana Galizia rrifjuta li jixhed taħt kontroeżami, li fih iċċitata l-possibbiltà ta’ awtoinkriminazzjoni.
It-talba tal-prosekuzzjoni argumentat li l-esklużjoni tax-xhieda ta’ Theuma ddgħajjef il-ġustizzja fil-proċess, iżda l-mozzjoni ntlaqgħet b’oġġezzjonijiet serji mit-tim tad-difiża. L-avukat difensur Stefano Filletti, li qed jirrappreżenta lil wieħed mill-akkużati, Anthony Muscat, oġġezzjona bil-kbir għal talba oħra li saret mill-prosekuzzjoni, u saħaq li dan l-aġir “qed iwassal volontarjament in-nullità tal-proċeduri tagħhom”.
Waqt is-seduta preċedenti kontra l-imputati Sandro Craus, Eeks Kap tal-Customer Care fl-Uffiċċju tal-Prim Ministru; Anthony Mario Ellul, Eks Segretarju Privat fil-Ministeru tal-Familja; u Anthony Muscat, l-Eks CEO tal-kumpanija statali Housing Maintenance and Embellishment Co Ltd, Theuma qal kontinwament li mhux se jwieġeb mistoqsijiet li jkunu sarulu.
L-akkużati kollha qed iwieġbu mhux ħatja ta’ serq u misapproprjazzjoni ta’ fondi pubbliċi. Waqt il-proċeduri kriminali separati, Theuma kien qal lill-Qorti li ħames xhur qabel seħħ il-qtil ta’ Daphne Caruana Galizia, huwa kien ingħata impjieg minn Schembri fil-Housing Maintenance and Embellishment Co Ltd, li minnha rċieva salarju, minkejja li fil-fatt qatt ma tfaċċa għax-xogħol.
Fit-13 ta’ Novembru, il-Maġistrat Monica Vella tat digriet dettaljat li jgħid li r-rifjut ta’ Melvin Theuma li jagħmel kontroeżami kisret diversi prinċipji legali. Dan ma ħalla lill-Qorti l-ebda għażla ħlief li tilqa’ t-talba tad-difiża biex teskludi x-xhieda ta’ Theuma u tagħmilha inammissibbli.
Il-Qorti ordnat li din ix-xhieda titneħħa mill-atti tal-kawża, inklużi dawk mill-inkjesta maġisterjali, li kienu tressqu bħala prova. L-Erbgħa filgħodu, il-Qorti tat digriet dwar it-tielet talba li saret mill-prosekuzzjoni fejn talbu li l-esklużjoni tax-xhieda ta’ Theuma tiġi revokata “contrario imperio”. Il-Qorti ċaħdet din it-tielet talba u wissiet lill-prosekuzzjoni biex twaqqaf tali azzjonijiet.
Fis-7 ta’ April, il-Kummissarju tal-Pulizija ressaq mozzjoni oħra quddiem il-Qorti tal-Maġistrati biex jikkontesta d-deċiżjoni dwar l-esklużjoni tax-xhieda ta’ Melvin Theuma. Fir-raba’ mozzjoni li tressqet, il-prosekuzzjoni sostniet li x-xhieda għandha tkun ammissibbli peress li huma kienu mġiegħla jippreżentaw l-aħjar evidenza disponibbli kontra l-akkużat.
Il-prosekuzzjoni sostniet ukoll li kien fl-istadju tal-kontroeżami li Theuma ddeċieda li ma jixhedx, deċiżjoni li fuqha l-prosekuzzjoni ma kellha ebda kontroll, u għalhekk ix-xhieda tiegħu li tiġi eskluża f’tali stadju kienet tiċħadhom il-prinċipju ta’ “ugwaljanza tal-armi,” li jassigura li ż-żewġ partijiet ikollhom opportunità ugwali biex jippreżentaw il-każ tagħhom.
Sostnew li dan id-dritt li ġie miċħud idgħajjef il-ġustizzja tal-proċeduri, għalhekk, il-prosekuzzjoni talbet lill-Qorti tirrevoka d-digrieti maħruġa u tippermetti li x-xhieda ta’ Theuma tkun suġġetta għal kontroeżami fis-seduta li jmiss.
Filletti spjega li din hija r-raba’ darba li l-Pulizija għamlet l-istess talba, li jemmen li hija abbuż mill-proċess tal-Qorti u għandha tiġi trattata bħala disprezz tal-Qorti. Fit-tweġiba tiegħu għat-talba tal-prosekuzzjoni, Filletti kompla li skont il-liġi proċedurali kriminali, il-kontroeżamijiet tax-xhieda tal-prosekuzzjoni jridu jsiru qabel mal-akkużat jippreżenta x-xhieda tagħhom jew qabel mad-difiża tkun tista’ tippreżenta l-evidenza tagħha.
Filletti irrimarka wkoll li l-każ inkwistjoni kien wasal fl-istadju finali tas-sottomissjonijiet u għalhekk, kien tard wisq fil-proċess biex il-prosekuzzjoni tkun qed titlob dan. Il-prosekuzzjoni semmiet ukoll artikoli legali irrilevanti, li jirreferu għas-setgħat tal-Maġistrat li jippresiedi waqt kumpilazzjoni ta’ provi u mhux fi stadji tant avvanzati ta’ proċess kriminali. Għalhekk il-Qorti ntalbet tiċħad it-talba tal-prosekuzzjoni u tieħu miżuri xierqa għal din l-imġiba ripetuta u mhux xierqa.
