Żagħżugħ ta’ 26 sena minn Pembroke l-Erbgħa ammetta li xtara u ppubblika materjal ta’ abbuż sesswali tat-tfal mill-akbar pjattaforma pornografika madwar id-dinja, magħrufa bħala KidFlix. Fil-Qorti nstema’ li fi Frar, il-Pulizija Maltija rċeviet informazzjoni mingħand l-awtoritajiet Ġermaniżi li r-raġel kien allegatament xtara materjal ta’ abbuż sesswali tat-tfal u sussegwentement ippubblikah.
Żagħżugħ ieħor ta’ 27 sena li kien tressaq il-ġimgħa l-oħra b’akkużi simili wkoll kien ammetta l-akkużi miġjubin kontrih. Il-ġimgħa li għaddiet, il-Pulizija Maltija ħabbret li kienu mqabbda f’investigazzjoni tal-Europol f’waħda mill-akbar pjattaformi għal materjal online ta’ abbuż sesswali tat-tfal fid-dinja. Żewġ irġiel Maltin ġew arrestati bħala parti mill-“Operation Stream”.
L-investigazzjoni mmirata lejn “KidFlix,” waħda mill-akbar pjattaformi għall-materjal tal-abbuż sesswali tat-tfal (CSAM). Bejn April 2022 u Marzu 2025, il-pjattaforma ġibdet 1.8 miljun persuna globalment u ospitat madwar 72,000 vidjow.
L-operazzjoni, li kienet tinvolvi aġenziji tal-infurzar tal-liġi minn aktar minn 35 pajjiż, hija l-akbar tax-xorta tagħha u diġà rriżultat fl-identifikazzjoni ta’ 1,400 suspettat u l-arrest ta’ 79 individwu madwar id-dinja. L-ispetturi tal-prosekuzzjoni qalu lill-Qorti l-Erbgħa li mal-arrest tiegħu, l-akkużat ikkopera bis-sħiħ u immedjatament tahom il-passwords kollha tal-apparat tiegħu, fuq talba tagħhom.
Waqt l-interrogazzjoni, huwa ammetta mill-ewwel għall-akkużi u qabel li għandu bżonn kura biex jindirizza l-problema ta’ saħħa mentali tiegħu. Fid-dawl ta’ dan, il-prosekuzzjoni talbet lill-Qorti biex tagħti lill-akkużat sentenza sospiża u biex toħroġ ordni ta’ trattament.
L-avukat difensur Veronica Anne Spiteri talbet il-ħelsien mill-arrest u wieġbet li meta jitqiesu l-fatti kollha, sentenza sospiża bħala piena mhix raġonevoli. Il-prosekuzzjoni oġġezzjonat minħabba biża’ li r-raġel ma jitfaċċax il-Qorti. Madankollu, Spiteri sostniet li l-klijent tagħha ġie arrestat fl-10 ta’ Marzu u ngħata l-police bail dakinhar u ma kien hemm l-ebda problemi.
Saħqet li rrapporta lill-Għassa tal-Pulizija meta ġie msejjaħ, u ċċarat li peress li kien diġà għadda xahar, kieku ried jaħrab mill-pajjiż, kien ikun diġà għamel dan. Hija kkonfermat ukoll li l-akkużat se jgħix fir-residenza fissa ta’ ommu. Il-Qorti semgħet ukoll li l-akkużat għadu kemm jiggradwa mill-Università ta’ Malta.
Id-difiża talbet projbizzjoni fuq il-pubblikazzjoni tal-ismijiet u din intlaqgħet mill-Qorti. Għall-ewwel, il-prosekuzzjoni oġġezzjonat għat-talba, madankollu l-Maġistrat Sant Lia qieset li l-fatt li isem l-imputat se jitpoġġa fuq il-lista tal-kriminali sesswali pubblika hija piena biżżejjed.
It-talba għall-ħelsien mill-arrest ingħatat mill-Qorti u nħarġet ordni ta’ superviżjoni addizzjonali sakemm tingħata deċiżjoni dwar is-sentenza.
L-Ispetturi Carl Pace u Wayne Buhagiar mexxew il-prosekuzzjoni. Il-Qorti kienet ippreseduta minn Nadine Sant Lia. L-avukat difensur Veronica Anne Spiteri rrappreżentat lill-akkużat.
