Raġel ta’ 36 sena ġie akkużat li ta fastidju u hedded li joqtol lis-sieħba tiegħu u lill-familja tagħha. Huwa ta wkoll struzzjonijiet lil ħabib tiegħu biex imur għall-għarrieda fid-dar tagħha biex jivverifika li kienet waħedha.
Costantino Leo, ċittadin Taljan li jgħix San Pawl il-Baħar ġie arrestat fl-Ajruport Internazzjonali ta’ Malta wara li aktar kmieni din il-ġimgħa rritorna Malta. L-ispettur Antonello Magri qal lill-Qorti li s-sieħba tar-raġelfit-8 ta’ April marret fit-Taqsima tal-Vjolenza Domestika biex tirrapportah.
Hija rappurtata li qalet lill-pulizija li l-fastidju beda f’Marzu meta sar paranojku li kienet qed tara rġiel oħra. Skont ir-rapport tal-pulizija tal-mara, huwa għajjarha bi kliem bħal “kelba” u “qaħba”, u hedded ukoll li se joqtol lilha u lill-familja tagħha.
Il-mara qalet lill-pulizija li Leo kellu jmur l-Italja biex jattendi funeral tal-familja. Madankollu, il-fastidju eskala, u r-raġel ipprova jċemplilha diversi drabi fuq WhatsApp waqt li kien imsiefer. Ġurnata wara li telaq lejn l-Italja, il-mara semgħet il-bieb iħabbat, u meta ħarġet barra sabet raġel ieħor, li ma kinitx taf.
Ir-raġel allegatament imbotta il-bieb ġewwa u daħal fir-residenza tagħha waqt li hi kien qiegħda fuq ‘video call’ ma’ Leo. Huwa rappurtat li għamel hekk biex jiċċekkja jekk kinitx waħedha. Il-mara allegatament ixxerjat bi żball messaġġi skambjati bejnha u s-sieħeb tagħha fuq Facebook, u meta sar jaf, allegatament qalilha “prosit, inti se tħallas għal dan kollu.”
Ir-raġel wasal lura Malta minn Ruma u ġie arrestat fl-ajruport. Leo, li qal li jaħdem bħala chef, ġie akkużat li wassal biex is-sieħba tiegħu tibża’ li se tintuża l-vjolenza kontriha, li ta fastidju lill-mara, u heddidha. Huwa kien akkużat ukoll li kiser l-Att dwar ir-Regolamentazzjoni dwar il-Komunikazzjonijiet Elettroniċi.
Ir-raġel wieġeb mhux ħati. L-avukat difensur Rachel Tua talbet għall-ħelsien mill-arrest u ssuġġerixxit li l-koppja kienu raqdu flimkien ftit qabel telaq lejn l-Italja. Hija qalet ukoll lill-Qorti li l-mara kienet saqitu lejn l-ajruport u li kienet taf lir-raġel li tfaċċa fir-residenza tagħha, peress li kien hemm tranżazzjonijiet bejniethom fuq Revolut.
L-ispettur tal-pulizija ċċara li xi ħadd kien ċempel lill-mara, u r-raġel issuspetta li kienet qed tara lil xi ħadd ieħor. Żied jgħid li skont ix-xhieda tal-mara, hija kielet biss mas-sieħeb tagħha l-lejl ta’ qabel telaq. L-ispettur oġġezzjona għat-talba għall-ħelsien mill-arrest fuq il-bażi li l-mara u t-tliet uliedha, li għandhom aktar minn 18-il sena, għadhom ma xehdux f’dawn il-proċeduri.
Il-Qorti, ippreseduta mill-Maġistrat Victor G. Axiak, ċaħdet lir-raġel il-ħelsien mill-arrest u nżamm arrestat. Inħarġet ordni ta’ protezzjoni favur il-vittma u wliedha. L-Avukat Sarah Sultana dehret bħala parte civile.
