Il-Ministru tas-Saħħa JoEtienne Abela xeħet ir-responsabbiltà kollha fuq iċ-ċivil għall-problema teknika fl-applikazzjoni tat-tender għall-espansjoni tal-isptar Mater Dei.
Ftit tal-ġranet ilu ġie żvelat illi kienet daħlet offerta waħda biss għat-tender għall-espansjoni tal-emerġenza u tal-wards tas-saħħa mentali – offerta li qed titlob id-doppju tal-istima oriġinali tal-Gvern.
Iżda, din ma kinitx l-unika offerta li ppruvat tiddaħħal; hekk kif jidher illi kien hemm kumpanija oħra li ppruvat tixħet offerta – bis-sistema elettronika tfalli f’dak il-mument, u għaldaqstant l-offerta….kif żvela d-deputat Adrian Delia…spiċċat ma tgħaddix.
Dan il-fatt qatt ma ġie miċħud mill-Ministru tas-Saħħa.
U meta mistoqsi minn Net News dwar dak li ġara, u jekk hu kienx mgharraf dwar din is-sitwazzjoni, huwa xeħet ir-responsabbiltà kollha fuq iċ-ċivil.
Minkejja li farfar fuq iċ-ċivil, il-Ministru tas-Saħħa stqarr li huwa jiddetta dak li jiġri fis-settur tas-saħħa – iżda mhux fil-proċessi tat-tender.
Il-Ministru JoEtienne Abela ma ċaħad bl-ebda mod li kien hemm problema fis-sistema elettronika.
Wisq anqas ma ċaħad illi hu kien mgħarraf, u baqa’ sieket.
It-tender tal-espansjoni tal-emerġenza u l-wards tas-saħħa mentali għalaq ftit tal-jiem ilu. Bl-unika offerta li tidħol tkun dik ta’ 140 miljun ewro – cioè – id-doppju tal-istima oriġinali tal-Gvern Malti.
