Raġel akkużat bi vjolenza domestika kien ilu ma jiffirma fl-Għassa tal-Pulizija sa mill-14 ta’ Awwissu 2024. Daniel Desmond Borg ta’ 35 sena tressaq il-Qorti taħt arrest l-Erbgħa filgħodu u akkużat li kiser il-kundizzjonijiet tal-ħelsien mill-arrest. Ir-raġel tressaq jumejn wara li l-Pulizija ħarġet avviż ta’ tfittxija.
Il-ħaddiem fil-kostruzzjoni minn Santa Luċija wieġeb mhux ħati tal-akkużi miġjuba kontrih. Ir-raġel kien ingħata l-ħelsien mill-arrest fi proċeduri kriminali relatati ma’ vjolenza domestika. L-ispettur Audrey Micallef ippreżentat il-ktieb tal-Għassa fejn jiffirmaw dawk b’ordni bil-Qorti.
Hija qalet lill-Maġistrat Abigail Critien li l-aħħar firma saret fl-14 ta’ Awwissu 2024. Minn dakinhar, qatt ma ffirma u lanqas ippreżenta ċertifikat mediku biex jiġġustifika n-nuqqas tiegħu. L-avukat tal-għajnuna legali Julia Micallef Stafrace talbet il-ħelsien mill-arrest.
Il-prosekuzzjoni oġġezzjonat, u qalet li r-raġel mhux biss ilu ma jiffirma iżda tilef seduta tal-qorti. Micallef żiedet tgħid li meta l-Pulizija fittxewh fid-dar ta’ ommu fil-ħin li għandu jkun ġewwa skont il-kundizzjonijiet tal-pleġġ, Borg ma kienx hemm, jiġifieri kien qed jikser ukoll curfew impost fuqu.
Wara li l-Pulizija ħarġu avviż ta’ tfittxija, ġew infurmati li jista’ jkun qed joqgħod mat-tfajla tiegħu. L-uffiċjali tal-Pulizija marru fir-residenza tal-mara f’Birkirkara. Huma setgħu jisimgħu xi storbju minn ġewwa, l-aktar ta’ kelb jinbaħ, iżda ħadd ma fetaħ il-bieb.
Huwa kien eventwalment arrestat nhar it-Tlieta fit-8am. L-Ispettur Micallef qajmet ukoll il-kwistjoni li r-raġel għamel allegazzjonijiet fuqha, li hija ċaħdet bil-qawwa kollha u ddeskriviet bħala “foloz”. “L-akkużat qed isostni li kien mhedded waqt l-interrogazzjoni. Użajna bodycams, u d-dikjarazzjoni ttieħdet bil-miktub. Tajnieh ukoll karta li tindika fejn jista’ jressaq rapport jekk iħossu aggravat.
“Nista’ nesebixxi l-filmat. Allegazzjonijiet foloz ma tantx jinżlu tajjeb miegħi peress li kulma qed nagħmel huwa xogħli biss,” qalet Micallef. L-avukat tar-raġel qalet li t-tfajla tiegħu kienet qed tistenna barra u li seta’ jgħix magħha.
Il-Qorti ċaħdet lir-raġel il-ħelsien mill-arrest.
