Il-Partit Laburista qatt ma emmen fil-Kunsilli Lokali; attentat ta’ tixħim fuq kuntratt tal-ġbir tal-iskart; bl-aġir tal-uffiċjali tagħhom jarmu lill-Kunsilli Lokali
F’stqarrija Emvin Bartolo Direttur Tal-Kunsillieri Lokali tal-Partit Nazzjonalista u Liam Sciberras President tal-Kulleġġ Kunsillera Lokali Partit Nazzjonalista saħqu fuq kif is-sentenza tal-Qorti tal-lum dwar attentat ta’ tixħim fuq kuntratt tal-ġbir tal-iskart tagħti daqqa oħra lill-Kunsilli Lokali li diġà qed jiffaċċjaw sfidi iebsin.
Konsulent li ġie inkarigat mill-Assoċjazzjoni tal-Kunsilli Lokali għandu jkun persuna li l-ewwel interess tagħha jkun l-effiċjenza tal-kunsilli lokali u kif dawn jistgħu joperaw bir-riżorsi nexfin li ħallielhom il-Gvern, u mhux kif se jħaxxen butu.
Mhux talli hekk talli meta l-vittma ta’ dan il-każ mar jitkellem Kastilja, dawn saddew widnejhom. Minn Kastilja flok iwaqqfu l-ħażen, japprovawh.
Kien Gvern Nazzjonalista li emmen li r-resident għandu jmexxi l-lokalità, se jkun Gvern ġdid Nazzjonalista li se jerġa’ jagħti lill-kunsilli lokali s-saħħa, l-awtonomija u d-dinjità li jixirqilhom, għax ir-resident ma ħaqqu xejn inqas.
