Il-Partit Nazzjonalista stqarr li l-Gvern ta’ Robert Abela qed jibqa’ jieħu deċiżjonijiet li juru bl-aktar mod ċar li għalih m’hemmx distinzjoni bejn ir-rwol eżekuttiv tal-Gvern u r-rwol politiku tal-Partit Laburista.
Il-Partit Nazzjonalista jqis il-ħatra tal-Kap Eżekuttiv tal-Partit Laburista bħala membru tal-bord ta’ Jobs Plus bħala manuvra perikoluża ħafna għax qed tagħti lill-istess tmexxija tal-partit aċċess għal informazzjoni u data kruċjali li l-Partit Laburista jista’ juża għall-fini politiċi partiġġjani.
Fi stqarrija ffirmata mix-Shadow Ministers Claudette Buttigieg, Ivan J Bartolo u Ivan Castillo, qalu li wieħed jistaqsi kif minn daqs dawk persuni kkwalifikati li għandna f’pajjiżna, il-Gvern ħass li l-aktar wieħed kapaċi għal din il-kariga kien il-Kap Eżekuttiv tal-Labour.
Il-preżenza tal-Kap Eżekuttiv ta’ partit politiku fuq il-bord tal-Jobs Plus, kif qalet fir-rappurtaġġ tagħha The Shift News, jista’ biss iwassal għal indħil politiku u kunflitt serju ta’ interess. Minħabba dan, Leonid Mckay qatt ma jista’ jitqies bħala persuna bla aġenda.
Il-Partit Nazzjonalista jħoss li manuvrar ta’ dan it-tip, mit-taxxi mħallsa poplu, ikomplu jimminaw il-fiduċja tan-nies fil-politika u juri wkoll nuqqas serju ta’ fiduċja fil-kompetenza ta’ persuni li lesti li jagħtu s-servizz tagħhom f’bordijiet u awtoritajiet simili. Gvern li bil-kiem kien wiegħed il-meritokrazija, bil-fatti qed juri x’jemmen verament.
