L-akbar partit politiku transnazzjonali Ewropew, il-Partit Popolari Ewropew, illum approva riżoluzzjoni li tikkundanna “d-deterjorament persistenti tal-governanza tajba u l-istat tad-dritt f’Malta, fejn l-istituzzjonijiet tal-istat għadhom kompromessi politikament, u b’hekk jippermettu kultura ta’ impunità li tipproteġi lil dawk involuti fil-korruzzjoni u l-abbużi tal-poter.”
Din ġiet adottata waqt il-Kungress tal-PPE f’Valencia, fejn id-delegati nġabru biex japprovaw it-tmexxija tiegħu u jadottaw pożizzjonijiet biex jiggwidaw il-politika tiegħu għas-snin li ġejjin.
L-MEP tal-PN u l-Kap tad-Delegazzjoni Nazzjonali fil-Parlament Ewropew David Casa qal li dan kien sinjal li l-PPE mhux se jabbanduna l-wegħdiet tiegħu li jsostni l-istat tad-dritt u li jiġġieled il-korruzzjoni.
Ir-riżoluzzjoni tressqet mill-Partido Popolar Spanjol.
“L-assassinju tal-ġurnalista Daphne Caruana Galizia kien konsegwenza diretta ta’ dan it-tkissir,” stqarret ir-riżoluzzjoni. “Madankollu snin wara, l-istess dgħufijiet strutturali jippersistu.
Il-PPE appella “lill-Kummissjoni Ewropea biex teżamina n-nuqqas tal-gvern Malti li jimplimenta riformi sinifikanti biex isaħħaħ l-indipendenza istituzzjonali u jiżgura r-responsabbiltà,” b’allużjoni għall-firxa ta’ riformi fl-inkjesta pubblika dwar l-assassinju ta’ Daphne Caruana Galizia li kienu ġew injorati mill-Gvern.
“Il-popli Malti u Għawdxi jistħoqqlu istituzzjonijiet li jaqdu l-interess pubbliku, mhux sistema li tipproteġi lil dawk konnessi politikament.
“Ir-restawr tad-demokrazija ta’ Malta jeħtieġ riformi ġenwini li jsaħħu t-trasparenza, ir-responsabbiltà, u l-integrità tal-kariga pubblika, mhux attakki fuq l-oppożizzjoni demokratika, il-midja, jew is-soċjetà ċivili.”
