Il-Bank of Valletta ħabbar l-ewwel webinar pubbliku, bil-għan li jgħin lill-individwi jipproteġu lilhom infushom minn scams u phishing permezz ta’ pariri prattiċi dwar kif jistgħu jħarsu l-informazzjoni personali u finanzjarja tagħhom. Il-webinar ta’ siegħa se jsir online nhar l-Erbgħa 7 ta’ Mejju 2025 fil-5pm. Huwa miftuħ għall-pubbliku, mingħajr ħlas, u se jkun bil-Malti.
Din l-inizjattiva tifforma parti mill-impenn kontinwu tal-Bank li jipprovdi edukazzjoni finanzjarja u protezzjoni lill-klijenti. Il-webinar se jitmexxa minn Ryan Caruana, Group Chief Anti-Financial Crime & Money Laundering Reporting Officer. Se jkun preżenti wkoll il-Kap Eżekuttiv, Kenneth Farrugia, li se jagħmel intervent.
Matul is-sessjoni, il-parteċipanti se jingħataw informazzjoni dwar metodi użati mill-frodisti biex iqarrqu bil-vittmi, kif tipikament jiżvolġu l-iscams, u l-passi li wieħed jista’ jieħu biex iħares lilu nnifsu. Permezz ta’ eżempji reali u lingwaġġ sempliċi, is-sessjoni se toffri pariri prattiċi dwar liema huma l-bozoz il-ħomor, kif tiġi mħarsa l-informazzjoni personali u finanzjarja, u kif wieħed jindirizza b’mod xieraq attività suspettuża.
L-iscams finanzjarji u t-tentattivi ta’ phishing qed ikomplu jiżdiedu u huma mmirati lejn persuni minn kull qasam tal-ħajja. Il-kriminali qed isiru dejjem aktar sofistikati, bl-użu ta’ tattiċi li jisfruttaw emozzjonijiet bħall-biża’, l-urġenza, u l-fiduċja.
Il-Bank of Valletta jistieden lil kull min jixtieq ikun jaf aktar kif jipproteġi aħjar lilu nnifsu biex jirreġistra llum. Ir-reġistrazzjoni għal dan il-webinar tista’ ssir permezz ta’ din il-link
jew bl-użu tal-Kodiċi QR ipprovdut.
Is-sessjoni hija miftuħa għall-pubbliku, u l-parteċipanti se jkollhom ukoll l-opportunità li jistaqsu mistoqsijiet f’ħin allokat apposta lejn l-aħħar tas-sessjoni.
Għal aktar informazzjoni, wieħed jista’ jżur il-paġna https://www.bov.com/anti-financial-crime-webinar , jew jikkuntattja lill-aġenti tal-Customer Service Centre fuq +356 21312020.
