Madwar 26 provinċjal Ewropew tal-Ordni Dumnikan iltaqgħu f’Malta għal-Laqgħa Interewropea tal-Ordni tal-Predikaturi (IEOP) 2025 bejn it-22 u s-26 ta’ April.
Din il-laqgħa annwali, li sservi bħala spazju ta’ riflessjoni u skambju bejn il-mexxejja Dumnikani fl-Ewropa, laqqgħet flimkien superjuri maġġuri Dumnikani minn madwar il-kontinent. L-avveniment kien immarkat bil-preżenza tal-Majjistru Ġenerali tal-Ordni, Fra Gerard Francisco Timoner III OP.
L-IEOP 2025 ipprovdiet pjattaforma għall-provinċjali, viċi-provinċjali u assistenti tal-Majjistru, ġejjin minn aktar minn 20 pajjiż differenti, sabiex tiġi diskussa l-missjoni Dumnikana fl-Ewropa ta’ żminijietna. Il-parteċipanti ġew minn firxa wiesgħa ta’ reġjuni, fosthom l-Iskandinavja, ir-Renju Unit, l-Iberja, l-Ewropa Ċentrali u tal-Lvant, u l-Mediterran.
L-aġenda tal-laqgħa ffokat fuq il-qsim ta’ esperjenzi, l-evalwazzjoni tal-isfidi appostoliċi u amministrattivi tal-lum, kif ukoll fuq it-tħejjija għall-Kapitlu Ġenerali tal-Ordni li ser isir aktar tard din is-sena. Is-sessjonijiet enfasizzaw l-importanza tal-kollaborazzjoni, ir-rinnovazzjoni u l-ippjanar strateġiku biex jiġu indirizzati l-ħtiġijiet dejjem jinbidlu tal-Knisja u tas-soċjetà.
Il-qofol tal-IEOP 2025 intlaħaq permezz ta’ quddiesa konċelebrata għall-Familja Dumnikana Maltija fil-Knisja ta’ Sidtna Marija tal-Għar fir-Rabat, immexxija mill-Majjistru Ġenerali tal-Ordni, Fra Gerard Francisco Timoner OP.
Il-laqgħa tal-IEOP 2025 f’Malta kompliet it-tradizzjoni ta’ kollaborazzjoni interewropea, b’laqgħat preċedenti jsiru f’diversi pajjiżi oħra tal-Ewropa bl-għan li jissaħħu r-rabtiet bejn il-komunitajiet Dumnikani. Din is-sena din il-laqgħa reġgħet affermat u ġeddedt l-impenn tal-Ordni lejn il-missjoni tiegħu li jippriedka l-Evanġelju u jservi lill-poplu ta’ Alla madwar il-kontinent.
