Ivan Castillo, PN
Id-Deputat Nazzjonalista Ivan Castillo qal fil-parlament li l-OHSA għandha tkun speċjalizzata f’diversi settri fis-saħħa u s-sigurtà fuq il-post tax-xogħol.
Ivan Castillo qal li l-pajjiż ilu jitkellem is-snin dwar l-iskills card iżda s’issa dawn m’humiex mandatorji. Hu tratta l-importanza ta’ dawn l-iskills cards biex il-persuni kollha fuq il-post tax-xogħol jkunu kollha mħarrġa sew biex iwettqu x-xogħlijiet.
Jeħtieġ li dawn l-iskills cards jkunu implimentati fis-settur tal-kostruzzjoni għaliex wara kollox fis-settur tat-turiżmu, l-gvern daħħal l-iskills cards f’ġimgħatejn iżda fil-kostruzzjoni ilu jitkellem fuqhom 10 snin u sarx biżżejjed.
Id-deputat Nazzjonalista tkellem dwar il-prevenzjoni u qal li l-OHSA għandha tkun l-Awtorità li tixpruna l-prevenzjoni. Jeħtieġ li anki s-saħħa mentali fuq il-post tax-xogħol tkun trattata bi prijorità, sostna Ivan Castillo, li qal li l-pajjiż għandu jitratta l-abbużi fuq il-post tax-xogħol.
Ivan Castillo qal li hu tajjeb li żdiedu l-ispezzjonijiet fuq il-post tax-xogħol iżda jeħtieġ l-ispeċjalizzazzjoni f’diversi setturi fosthom f’dak marittimu li jikkontribwixxi bil-qawwi għall-ekonomija u jħaddem eluf ta’ ħaddiema. Minkejja dan f’dan is-settur m’hemmx serħan il-moħħ il-ħaddiema qed jaħdmu f’sitwazzjonijiet ta’ saħħa u sigurtà fuq il-post tax-xogħol. Fil-fatt, fl-OHSA m’hemmx ħadd speċjalizzat f’dan is-settur, sostna Ivan Castillo.
