Mistieden fuq il-programm Net Live, Andrew Agius Muscat, Chairperson tal-MHRA (Malta Hotels and Restaurants Association), iddeskriva s-sitwazzjoni preżenti tat-traffiku f’San Ġiljan, Tas-Sliema u Swieqi bħala rebus li qed jikkawża frustrazzjoni kbira, kemm għar-residenti kif ukoll għall-industrija turistika.
Agius Muscat spjega kif dan l-inkwiet qed jirriżulta minn nuqqas ta’ koordinazzjoni bejn l-entitajiet governattivi li bħalissa qed iwettqu xogħlijiet infrastrutturali estensivi fil-lokalitajiet l-aktar traffikanti tal-pajjiż.
Ix-xogħlijiet, li jinkludu trenching għal cables tal-elettriku u manutenzjoni ta’ toroq, qed isiru fl-istess ħin, u dan qed iwassal għal ġimgħat sħaħ ta’ konġestjoni bla soluzzjoni viċin.
Intant, huwa wera t-tħassib tiegħu dwar kif dawn il-proġetti, għalkemm meħtieġa u b’intenzjoni tajba, qed ikollhom impatt serju fuq is-settur tal-lukandi u r-ristoranti – wieħed mill-aktar setturi sensittivi u kruċjali għall-ekonomija Maltija.
Il-konġestjoni fit-toroq qed toħloq sfidi loġistiċi u qed tnaqqas l-attrattiva ta’ dawn il-lokalitajiet għal turisti li ħallsu prezzijiet mhux ħfief biex igawdu vaganza f’ambjent paċifiku.
Agius Muscat sostna li s-sbuħija ta’ Malta bħala destinazzjoni qed tiġi kompromessa, u dan jista’ jaffettwa direttament il-kwalità tat-turiżmu li l-pajjiż ilu snin jipprova jattira.
Saħaq fuq il-ħtieġa ta’ inizjattiva ċentrali li tħares lejn dawn ix-xogħlijiet b’mod ħolistiku u organizzat, sabiex il-progress infrastrutturali ma jkollux konsegwenzi negattivi fuq setturi oħra.
Il-messaġġ tiegħu kien ċar: mingħajr ħarsien koordinat u komunikazzjoni trasparenti mal-pubbliku, il-frott tax-xogħol se jitkisser minn kritika ġustifikata – mhux biss minn residenti, imma wkoll mit-turisti li jridu esperjenza tajba u bla ostakli.
