Raġel ta’ 44 sena residenti Ta’ Xbiex bi problema ta’ droga ġie kkundannat tliet snin ħabs wara li nstab ħati li beżża’ u hedded lil ommu anzjana fejn qalilha li kien se joqtolha. Kenneth Zammit instab ħati mill-Maġistrat Abigail Critien ta’ vjolenza domestika fuq ommu u li kkaġunalha biża’ li tista’ ssir vjolenza fil-konfront tagħha.
Fis-sentenza, il-Qorti appellat biex issir bidla fil-mod kif isir l-assessjar tar-riskju f’każi ta’ vjolenza domestika fejn il-partijiet ma jkunux f’relazzjoni intima. Kenneth Zammit, li kien jgħix m’ommu f’Ta’ Xbiex, instab ħati li fit-18 ta’ Jannar li għadda u fiż-żmien ta’ qabel, għadda lil ommu minn tbatija fiżika jew mentali, li ġiegħla tibża’ li se tintuża vjolenza kontriha, li taha fastidju, u heddidha.
Il-Qorti semgħet kif omm l-akkużat marret tirrapportah fit-Taqsima tal-Vjolenza Domestika tal-Pulizija. Il-mara qalet li binha ilu jabbuża mill-eroina sa minn meta kellu 16-il sena, u li ġimgħat qabel kien qed jitlobha l-flus bejn darbtejn u tlieta fil-ġimgħa, u kienet anki tatu l-flus biex imur joqgħod f’hostel, iżda reġa’ ġie lura u beda jdaħħal nies id-dar li ma tafhomx.
Qalet li dakinhar kienet marret tqajmu filgħodu biex joħroġ, u meta baqgħet tiffittah qalilha biex ma tgħajjatx jekk ma tridux jirrabbja. Qalilha li jekk tkompli kien se jaqbad jagħtiha b’sikkina sakemm joqtolha. Qalet li ħassitha xxukkjata b’dak il-kliem u fetħet il-bieb ta’ barra għax bdiet tibża’, iżda hu beda jerġa’ jagħlqu.
Qalet li wara dan l-episodju marret tgħix f’post ieħor għax bdiet tibża’ minnu, u minn dak iż-żmien qatt ma reġa’ għamel kuntatt magħha. Il-Qorti osservat li minflok ħarġet bil-pensjoni, l-omm baqgħet taħdem biex issostni lilu u lil ibnu ta’ 10 snin, mentri hu ma jaħdimx.
Test tal-urina li ttieħed lil Zammit ħareġ pożittiv għall-kokaina, opiates, u buprenorphine. Il-Qorti qieset l-assessjar tar-riskju li sar mill-ħaddiema tal-Aġenzija Appoġġ, li fil-Qorti spjegaw li ma ntużatx sistema ta’ punteġġ biex tikklasifika l-livell ta’ periklu tal-vittma, peress li l-vittma u l-aggressur ma kinux f’relazzjoni intima, u li l-għajnuna offruta kienet biss mil-lat psikoloġiku u emozzjonali, u mhux għal fini ta’ prosekuzzjoni.
Il-Qorti qalet li l-omm sofriet vjolenza domestika minn binha fuq medda ta’ żmien li huwa ċar li ħalla effett psikoloġiku akut fuqha, allura ma tistax tifhem ir-raġuni għalfejn issir distinzjoni fl-operat u kif l-allegati vittmi jiġu trattati.
Din hija prassi li Din il-Qorti tara li ma tagħmel ebda sens legali, toħloq distinzjoni inutili bejn l-allegati vittmi u aktar minn hekk toħloq anomalija għaliex ma jkun hemm ebda dokument li jagħti ħjiel ta’ dak kollu li tkun stqarret l-allegata vittma waqt tali assessment.
Il-Qorti appellat biex issir riforma ħalli każijiet ta’ vjolenza domestika jkunu trattati bl-istess mod, u ma tibqax tingħata l-impressjoni li każijiet li ma jinvolvux koppja f’relazzjoni intima huma inqas serji minn oħrajn.
Meta ġiet għas-sentenza, il-Qorti sabet lil Zammit ħati għall-akkużi kollha u kkundannatu tliet snin ħabs effettivi. Il-Qorti ħarġet ukoll Ordni ta’ Trażżin fil-konfront tal-omm għal perjodu ta’ tliet snin, poġġiet lil Zammit taħt Ordni ta’ Trattament għal ħames snin, u ordnat li jkun assenjat uffiċjal tal-probation biex jirrapporta dwaru kull tliet xhur.
Għal Zammit dehret l-Avukat Yanika Bugeja filwaqt li bħala parte civile dehru l-Avukati Arthur Azzopardi u Jacob Magri. Il-prosekuzzjoni tmexxiet mill-Ispettur Christian Cauchi.
