Dawn il-kundizzjonijiet jidhru li jiksru l-Karta tad-Drittijiet tal-Pazjent fil-qasam tas-Saħħa f’Malta (disponibbli hawnhekk), u qed nibbaża d-definizzjoni tiegħi ta’ “saħħa” minn dan id-dokument li jgħid:
“Is-Saħħa: Stat ta’ benesseri fiżiku, mentali u soċjali komplut u mhux sempliċement in-nuqqas ta’ mard jew dgħufija.” (p. 4)
Huwa ċar li s-sitwazzjoni fil-Ward Maskili 1B (u possibilment wards oħra) qed timmina d-drittijiet fundamentali ta’ persuni b’disturbi mentali, kif ukoll id-drittijiet tal-impjegati responsabbli għall-kura tagħhom.
Kwistjonijiet li jiksru d-Dritijiet Umani
1. L-Ambjent li jgħixu fih
Il-pazjenti huma ristretti f’żona ta’ rqad vojta u iffullata żżejjed, mingħajr aċċess għall-arja friska, dawl naturali, jew spazji terapewtiċi; apparentement m’hemmx salott, faċilitajiet limitati għall-għawm u t-toilets, l-ebda kamra kwieta, l-ebda kamra għar-rekreazjoni , u lanqas spazju biżżejjed għall-istaff – dan jikser b’mod dirett il-punt 4 tal-Karta: “Li wieħed jistenna li t-trattament jiġi pprovdut f’ambjent xieraq, sigur u nadif” (p. 16), u li jirrispetta d-dinjità u l-privatezza tal-bniedem.
2. Kundizzjonijiet taż-Żjarat:
Il-kamra taż-żjarat tinsab fi stat ta’ telqa serja u ma tipprovdix ambjent deċenti u komdu li jilqa’ lill-familji u lill-carers b’dinjità u sens ta’ kompassjoni.
3. Appoġġ Terapewtiku u Soċjali:
In-nuqqas ta’ attivitajiet terapewtiċi strutturati jċaħħad lill-pazjenti mid-dritt għall-kura olistika, u jmur kontra l-prinċipju ta’ kura komprensiva u kontinwa.
4. Iżolament:
Bl-eċċezzjoni ta’ televiżjoni wieħed għall-użu kollettiv, il-pazjenti huma prattikament iżolati, u dan jmur kontra d-dritt tagħhom għal ambjent terapewtiku.
5. Saħħa Fiżika u Mentali:
In-nuqqas ta’ ventilazzjoni adegwata u aċċess għall-ispazji ta’ barra qed jaffettwa b’mod serju is-saħħa fiżika u mentali.
6. Il-Benesseri tal-Istaff:
L-istess kundizzjonijiet degradanti għall-pazjenti qed ipoġġu pressjoni kbira fuq l-istaff.
RRAKKOMANDAZZJONIJIET
L-operat ta’ ward f’dawn il-kundizzjonijiet gravi ma jistax jiġi ġġustifikat f’ebda sistema tas-saħħa li tiddikjara li tirrispetta d-drittijiet fundamentali tal-bniedem. Hemm bżonn ta’ azzjoni immedjata biex jiġu evitati aktar ħsarat u biex tiġi restawrata d-dinjità ta’ dawk f’idejn din l-istituzzjoni – kemm pazjenti kif ukoll staff.
