Passiġġier ta’ 21 sena ġie illiberat bil-kundizzjoni li ma jwettaqx reat ieħor għal tliet snin wara li qal b’mod falz li impjegat tal-ajruport kien qed iġorr bomba fil-basket tiegħu. Taha Osama Ali Edriz, ċittadin Libjan li jgħix fi Swieqi, kien qed jistenna biex jitla’ fuq it-titjira tiegħu lejn Bergamo, l-Italja, nhar il-Ħamis meta twaqqaf għax il-bagalja, il-‘hand luggge’ tiegħu, ma kinitx skont id-dimensjonijiet għall-bagalji.
Ir-raġel ħallas €75 biex il-bagalji jiġu rreġistrati u meta mistoqsi jekk kellux xi apparat elettroniku, ir-raġel qal li kien qed iġorr bomba. L-inċident ikkawża paniku u wassal biex is-sigurtà tal-avjazzjoni tintervjeni u tneħħi lir-raġel mill-kju tat-tlugħ abbord. Sussegwentement huwa ġie arrestat.
Edriz immedjatament skuża ruħu għal dak li kien għadu kif għamel kemm fl-ajruport kif ukoll waqt id-dikjarazzjoni tiegħu lill-Pulizija. Fil-Qorti, Edriz ammetta l-ħtija li xerred aħbarijiet foloz b’mod malizzjuż u li għamel stqarrija falza relatata mal-bagalji tiegħu lill-uffiċjali tal-ajruport.
Il-prosekuzzjoni qalet lill-Qorti li r-raġel ikkoopera bis-sħiħ mal-Pulizija u ħassu ħażin dwar dak li kien għadu kif għamel. L-Ispettur tal-Pulizija Mohammed Shurab żied jgħid li d-dikjarazzjoni ta’ Edriz lill-impjegati ta’ Aviaserve kkawżat “xi kaos” u li din segwiet argument mal-‘groundhandlers’ wara li rrifjutaw li jħalluh jieħu l-bagalji tiegħu bħala bagalji tal-idejn.
Shurab qal li f’dan il-każ multa tkun kastig xieraq. L-avukat tad-difiża Roberto Spiteri spjega li r-raġel kellu biss affarijiet personali fil-basket tiegħu. Huwa insista li l-klijent tiegħu kien sostna biss li kellu bomba bħala “ċajta” u qatt ma immaġina li kienet se tikkawża kommossjoni bħal din. Huwa skuża ruħu wkoll ma’ dawk kollha involuti.
L-avukat talab li jiġi illiberat b’kundizzjonijiet fid-dawl taċ-ċirkostanzi tal-każ. Wara li semgħet is-sottomissjonijiet dwar il-kastig, il-Qorti sabet lir-raġel ħati bl-ammissjoni tiegħu stess u illiberatu b’kundizzjonijiet għal perjodu ta’ tliet snin.
“Ċajt bħal dan mhu ċajta xejn,” qalet il-Maġistrat Rachel Montebello lill-akkużat, filwaqt li żiedet li wieħed ma jistax imur jgħid affarijiet bħal dawn, irrispettivament mill-intenzjoni tiegħu. L-Ispettur tal-Pulizija Mohammed Shurab u Roxanne Tabone mexxew il-prosekuzzjoni filwaqt li l-avukat Roberto Spiteri assista lill-akkużat.
