Il-Qorti lliberat lil Ruben Mario Farrugia ta’ 49 sena, minn akkużi ta’ attentat biex jiġbed ritratti b’konnotazzjonijiet sesswali privati ta’ żewġ nisa mingħajr kunsens, bl-akkużat li huwa miż-Żurrieq jgħid li ma kellu l-ebda intenzjoni speċifika li jwettaq ir-reat.
Il-każ, ippresedut mill-Maġistrat Kevan Azzopardi, oriġina minn inċident fit-12 ta’ Novembru 2021, għall-ħabta tat-8pm, ġewwa il-Burger King f’Raħal Ġdid. Il-pulizija rċeviet rapport li persuna allegatament kienet qed tieħu ritratti ta’ nisa li kienu qed jużaw it-tojlit billi r-raġel daħħal mowbajl minn taħt il-ħitan tal-‘cubicles’.
Mal-wasla tagħhom, il-pulizija raw lil Farrugia ħiereġ minn kabina li kienet “għal persuni b’diżabilità” bil-mowbajl tiegħu f’idu, u deher sorpriż meta ra lill-uffiċjali. Huwa ttieħed l-għassa tal-pulizija, fejn ta l-mobajl tiegħu, li kien fih ritratti meħuda fit-tojlit mill-parti t’isfel ta’ kabina.
Farrugia esprima dispjaċir għall-inċident, u stqarr li ma kien jidher xejn fuq it-telefon ċellulari. Filmati tas-CCTV urew lil Farrugia jidħol fit-tojlit fis-7:25pm u joħroġ meta waslu l-pulizija.
Il-prosekuzzjoni akkużat lil Farrugia li pprova jikkawża tbatija, ħsara emozzjonali, jew ħsara ta’ kwalunkwe tip fuq żewġ nisa – billi pprova jieħu ritratti sesswali privati mingħajr il-kunsens tagħhom.
Filwaqt li l-qorti rrikonoxxiet li Farrugia wera l-intenzjoni li jieħu ritratti ta’ individwi fit-tojlit billi niżżel it-telefon tiegħu minn taħt il-partition tal-kabina, kellha “dubji serji” dwar l-argument tad-difiża li kien sempliċement qed jiċċekkja l-kamera tat-telefon tiegħu.
Madankollu, id-deċiżjoni tal-qorti tiddependi fuq l-element formali tar-reat, speċifikament l-intenzjoni tal-akkużat. Il-qorti rreferiet għall-Artikolu 208E(1), li jiddefinixxi r-reat bħala t-teħid jew l-iżvelar ta’ immaġni sesswali privata mingħajr kunsens, bl-intenzjoni li tikkawża tbatija jew ħsara. Il-qorti kkonkludiet li Farrugia ma kellux l-intenzjoni speċifika li jwettaq ir-reat kif ikkontemplat minn dan l-artikolu.
Fid-deliberazzjoni tagħha, il-qorti ddikjarat li biex attentat ikun punibbli, ir-reat irid ikun jista’ jiġi eżegwit u kkonsmat. Minħabba l-element formali tal-akkuża, il-qorti ma kinitx sodisfatta li l-elementi tal-akkużi allegati ġew ippruvati lil hinn minn kull dubju raġonevoli, u b’hekk illiberat u eżonerat lill-akkużat. Għal Farrugia dehru l-Avukati Joseph Goglio u Mattea Giglio.
