Il-Korea ta’ Fuq ikkritikat il-pjan tal-Istati Uniti biex toħloq Golden Dome; sistema futuristika ta’ difiża missilistika. Bil-pajjiż Komunista jwissi li dan jista’ jbiddel l-ispazju f’potenzjal ta’ gwerra nukleari.
Is-sistema tad-difiża, li l-President Amerikan Donald Trump qed jippjana li jippreżenta sal-aħħar tat-terminu tiegħu, hija mmirata biex tindirizza theddid ġdid mill-ajru, inkluż missili ballistiċi.
Il-Ministeru tal-Affarijiet Barranin ta’ Pyongyang akkuża lill-Istati Uniti li tinsab ossessjonata, u wissa li dan il-pjan jista’ jqajjem ġirja globali għall-armi nukleari u spazjali.
Il-Korea ta’ Fuq tikkunsidra lill-Istati Uniti bħala avversarju u spiss tikkundanna t-taħriġ militari konġunt bejn l-Istati Uniti u l-Korea t’Isfel.
Il-Korea ta’ Fuq ingħaqdet maċ-Ċina fil-kritika tagħha tal-pjan Amerikan. Il-gvern ta’ Beijing qal il-ġimgħa li għaddiet li huwa imħasseb serjament dwar is-Golden Dome, u qal li dan il-pjan għandu implikazzjonijiet serji.
Bosta analisti jemmnu li aġġornament tas-sistemi ta’ difiża limitati tal-Istati Uniti huwa meħtieġ, iżda wħud qed iwissu li l-iżvilupp tal-Golden Dome jista’ jiffaċċja sfidi tekniċi u politiċi. Wieħed mill-ostakli ewlenin huwa l-ispiża qawwija tiegħu, b’allokazzjoni inizjali ta’ $25 biljun.
