Malta għadha kemm rebħet l-ewwel midalja tad-deheb fl-ewwel ġurnata tal-Logħob tal-Pajjiżi ż-Żgħar li qed isiru f’Andorra.
Jessica Vella, li għandha 19-il sena, rebħet id-deheb fil-Karate fl-event tal-Kata.
Vella bdiet il-kompetizzjoni bl-aħjar mod possibbli meta rebħet Grupp B b’żewġ rebħiet kontra atleti minn Liechtenstein u Monaco.
Fis-semifinali, Vella għelbet lill-atleta minn Andorra, Maria Ubiergo bil-punteġġ ta’ 36.8 għal 38.4.
Fil-finali, Vella kienet fl-aqwa forma possibbli u għelbet il-kompetizzjoni tal-avversarja Mila Mrakovic mill-Montenegro, bil-punteġġ finali ta’ 37.8 għal 39.1.
