Wara s-suċċess ta’ Tibqax Tgħix fil-Passat u Ħsibijiet, din tal-aħħar ippreżentata waqt l-aħħar edizzjoni ta’ Mużika Mużika f’kollaborazzjoni ma’ Ema u Liston, Kapitlu Tlettax, magħmul minn Joseph u Dwardu – jerġa’ lura b’kanzunetta ġdida u mimlija emozzjoni: Hawn Għalik. Din id-darba jingħaqdu għall-ewwel darba ma’ Reanue, kantanta żagħżugħa u promettenti li ħadet sehem f’diversi spettakli mużikali fosthom Junior Voices u Tour Music Fest.
Hawn Għalik hija messaġġ ta’ mħabba u gratitudni, miktub minn tifla għall-missierha fil-jum tat-tieġ tagħha. Il-lirika ċentrali “nixtieq nirringrazzjak tal-imħabba li dejjem tajt” tirrifletti b’mod sempliċi iżda qawwi l-qalba tal-kanzunetta. Il-produzzjoni kienet f’idejn Cyprian Cassar, filwaqt li l-vidjo mużikali ġie maħdum minn Memorabilia Films; b’kunċett sempliċi mimli emozzjoni.
“Din il-kanzunetta twieldet minn sens ta’ gratitudni li ħafna drabi jibqa’ fil-vojt. Kliem li forsi qatt ma jingħad direttament, iżda li jixirqilhom jinstemgħu b’mod sabiħ u sinċier,” qal Joseph f’isem Kapitlu Tlettax. Reanue żiedet, “Kelli ħafna emozzjoni f’din il-kanzunetta. Hija l-ewwel darba li qed nieħu sehem f’diska bħal din, u l-fatt li qed nagħmilha ma’ Kapitlu Tlettax għamlitha aktar speċjali. Hija diska li verament ħarġet mill-fond ta’ qalbi.” Hawn Għalik issa hija disponibbli fuq YouTube u Facebook.
(4) Hawn Għalik – Kapitlu Tlettax Ft. Reanue – YouTube
