Id-delegazzjonijiet tar-Russja u l-Ukrajna kkonkludew tieni rawnd ta’ taħditiet għall-paċi waqt laqgħa oħra f’Istanbul, fit-Turkija.
U bħalma l-ewwel rawnd tat-taħditiet ma wassalx għal żblokk sinifikanti jew ‘storiku’, it-taħditiet ġodda lanqas ma produċew żvilupp li kapaċi jqarreb il-konflitt tal-Ukrajna lejn konklużjoni.
Fl-ewwel rawnd tat-taħditiet bejn id-delegazzjonijiet (u li kien sar ix-xahar li għadda) ir-Russja u l-Ukrajna kienu qablu dwar l-iskambju ta’ mijiet ta’ priġunieri tal-gwerra. U fl-aħħar sigħat, il-President Ukren, Volodymyr Zelensky, qal li qed jistenna ‘skambju simili ta’ priġunieri fis-sigħat u l-jiem li ġejjin’. Dan bħala l-unika ħaġa pożittiva li għandha tirriżulta mil-laqgħat konklużi.
L-aħħar taħditiet f’Istanbul saru fi klima ta’ tensjoni akuta wara li l-Ukrajna, nhar il-Ħadd, wettqet l-akbar attakk bid-drones fuq ir-Russja għaż-żmien kollu li ilu għaddej il-konflitt. Attakk li fih inqerdu l-għexieren tal-bombers tal-qawwiet tal-ajru Russi u li seħħ b’reazzjoni għall-attakki intensivi li r-Russi, fi tmiem il-ġimgħa, kienu wettqu fuq Kiev u bliet ewlenin oħra tal-Ukrajna.
Il-President Zelensky – li fl-aħħar sigħat attenda summit mal-Alleati fil-Litwanja – qal li nuqqas ta’ riżultati konkreti mid-djalogu f’Istanbul għandu jwassal għal sanzjonijiet ‘akbar u aktar effettivi’ għall-Kremlin u għal Vladimir Putin.
L-osservaturi jemmnu wkoll li r-Russi ‘bilfors’ li qed ikollhom jieħdu sehem fl-inizjattivi diplomatiċi biex jevitaw ‘konfrontazzjoni’ mal-President Amerikan, Donald Trump. Dan meta l-Istati Uniti ilha l-aħħar ġimgħat tilgħab ir-rwol ta’ medjatur bit-tama li tieqaf il-gwerra fl-Ukrajna u bi Trump, riċentement, jikkritika lil Vladimir Putin għall-attakki bla heda fuq l-artijiet Ukreni u ‘d-dmija eċċessiva fost il-poplu’.
Sadanittant, hemm ukoll żvilupp pożittiv għall-Ukrajna permezz ta’ stqarrija konġunta li segwiet is-summit ta’ Vilnius (fil-Litwanja) li sar bil-parteċipazzjoni tal-Mexxejja tal-Istati Nordiċi u tal-Lvant imsieħba man-NATO.
Din l-istqarrija – firmata mill-Presidenti tal-Litwanja, il-Polonja u r-Rumanija – tirrepeti l-kundanna għall-invażjoni tal-Ukrajna mill-qawwiet tar-Russja.
L-istqarrija tisħaq li ‘dawn il-pajjiżi jappoġġjaw id-deċiżjoni u l-impenn tal-Alleati rigward it-triq irriversibbli tal-Ukrajna lejn l-integrazzjoni totali fl-istituzzjonijiet Ewropej u tal-Atlantiku. Integrazzjoni li fost oħrajn tinkludi s-sħubija fin-NATO.
It-tmexxija tal-Litwanja, il-Polonja u r-Rumanija qed jinsistu wkoll li l-Ukrajna għandha d-dritt biex tagħżel l-arranġamenti tagħha għas-sigurtà waqt li tiddeċiedi l-futur tagħha – ‘ħielsa mill-indħil barrani’. Dan meta r-Russja ilha s-snin tiddikjara li bl-ebda mod mhi se taċċetta li l-Ukrajna ssir membru sħiħ tal-Alleanza tal-Punent (in-NATO) jew li l-istess Alleanza tkompli tavviċina l-artijiet tar-Russi.
