Karol Nawrocki, politiku konservattiv, rebaħ ir-rawnd deċiżiv tal-elezzjoni għall-Presidenza tal-Polonja bi kważi 51 fil-mija tal-vot popolari.. Dan wara taqtigħa missielta mar-rivali ewlieni, Rafał Trzaskowski; is-Sindku ta’ Varsavja li kiseb 49.11 fil-mija tal-appoġġ.
Nawrocki se jilħaq minflok konservattiv ieħor – Andrzej Duda, li t-tieni u l-aħħar terminu tiegħu bħala President jiskadi f’Awwisu.
L-elezzjoni, sadanittant, irriflettiet id-diviżjonijiet profondi fil-Polonja li hi pajjiż influwenti tal-Unjoni Ewropea u n-NATO. U minkejja li d-deċiżjonijiet fuq livell nazzjonali qed jittieħdu mill-Prim Minsitru Pollakk, Donald Tusk, il-President tal-Polonja għandu wkoll id-dritt biex jinfluwenza l-politika barranija ta’ Varsavja.
Hu wkoll sinifikanti l-fatt li l-President Pollakk għandu d-dritt biex jeżerċita l-veto għal-leġiżlazzjoni li tgħaddi l-Assemblea.
Dan meta Tusk, li ilu fil-poter mill-2023, ma rnexxilux jikseb biżżejjed appoġġ biex jattwa xi wegħdiet elettorali u issa hu mistenni li jiffaċċja aktar ostakli ladarba Nawrocki kien ikkonfermat bħala President ġdid. Karol Nawrocki hu membru tal-Partit għal-Liġi u l-Ġustizzja li kien mexxa lill-Polonja mill-2015 sal-2023.
